Со пораката „Ако е вообичаено, не значи дека е праведно. Три пати мери, еднаш сечи, но никогаш не дискриминирај!“, денеска започна кампањата за заштита од дискриминација врз сите основи, вклучувајќи ја и сексуалната ориентација и родовиот идентитет. Кампањата е во организација на ХЕРА и на коалицијата Сексуални и здравствени права на маргинализирани заедници.
Први градови каде се промовира кампањата се Куманово, Штип и Струмица, а дополнително кампањата ќе биде претставена на трибини и во Битола и Тетово.
Како што информираат од ХЕРА, потребата од континуирано потсетување на јавноста за препознавање и пријавување на случаите на дискриминација, особено на локално ниво, се заснова на фактот што бројот на претставките е во постојано опаѓање.
Кампањата е дел од проектот за унапредување на механизмите за заштита од дискриминација на локално ниво во кој се вклучија Народниот правобранител на Република Македонија, Министерството за правда и Комисијата за заштита од дискриминација, како и општините Куманово, Штип и Струмица.
Главен резултат на проектот е основањето на координативни тела за заштита од дискриминација од Советите на општините Штип, Куманово и Струмица, кои ќе работат според Протокол за унапредување на соработката на локалните механизми за заштита од дискриминација.
„Што се однесува до заштитата од дискриминација на ЛГБТИ-заедницата, значајно е да се спомене дека во текот на оваа година, Министерството за труд и социјална политика спроведе консултативен процес за изменување на Законот за спречување и заштита од дискриминација. Се надеваме дека во текот на 2017 година ќе се усвојат измени кои ќе вклучуваат сексуална ориентација и родов идентитет, како основи за дискриминација, што воедно ќе ги охрабри ЛГБТИ-луѓето да пријавуваат дискриминација. Комисијата за заштита од дискриминација во текот на 2016 година одлучуваше во неколку случаи на дискриминација врз основа на сексуална ориентација и родов идентитет. Во повеќето случаи, Комисијата повторно не успеа да ја препознае дискриминацијата и соодветно да ги примени одредбите на Законот за спречување и заштита од дискриминација. Исклучок од ваквата пракса и позитивен пример беше еден случај каде Комисијата за заштита од дискриминација утврди дискриминација врз основа на родов идентитет и определи надомест на штета“, стои во соопштението на ХЕРА.
Кампањата ќе се спроведува на национално ниво, но е фокусирана на локалните самоуправи со кои ХЕРА соработуваше изминатата година. Кампањата ќе се емитува на пет локални и три национални телевизии, на македонски и на албански јазик.
М. Т.
