Арбен Зекири
Како што се засилува борбата против криминалот и корупцијата во Албанија, така сè повеќе се засилуваат протестите и немирите организирани од опозицијата.
Протестите и немирите почнаа откако започна процесот на ветингот во судство, обвинителство и политиката. Овој процес, за објаснување на нашите читатели, значи чешлање и реизбор на судиите, обвинителите и политичките претставници.
Според донесените законски измени, сите судии, обвинители и пратеници треба да дадат изјава дека не биле корумпирани или да се откажат од позицијата, ако не се сигурни и чисти. Тие што нема да потпишат ќе се поздрават од функцијата, а тие што ќе потпишат ќе бидат истражени и ако се потврди спротивното ги чека и губење на позицијата и затворска казна. На почетокот, реакциите беа помали, бидејќи неодамна беа и парламентарните избори каде владејачката Социјалистичка партија на премиерот Еди Рама победи со убедливо мнозинство и сам формираше влада, отстранувајќи го и дотогашниот партнер, Социјалистичкото движење за интеграција, кое претходно го предводеше актуелниот претседател Илир Мета, а сега го предводи неговата сопруга Моника Круемади.
Потоа, полицијата и органите на правдата удрија силно и по шверцот и по производството на дрогата во Албанија. Се запленија стотици тони марихуана и други видови наркотици и се уапсија многу лица од шверцерските мрежи. За прв пат откако Еди Рама е на власт, полицијата влезе и во селото Лазарат каде што со децении се произведуваше хашиш, а полицијата немаше пристап во ова село.
Со ударот врз шверцот на дрогата се интензивираа и тензиите, како и протестите организирани од опозициската Демократска партија и Социјалистичкото движење за интеграција. Власта цело време обвинуваше дека од времето на поранешното владеење, блиски роднини и соработници на врхушките на двете партии беа поврзани со криминалот, корупцијата и шверцот на дрогата.
Последната одлука на Владата на Еди Рама беше затворањето на спортските обложувалници, казина и игри на среќа под сомнение дека граѓаните се осиромашуваат и дека се водат криминални зделки. Одлуката стапи на сила од 1 јануари оваа година и сите игри на среќа беа затворени освен тие што се онлајн. По оваа одлука, неколку пати повеќе се интензивираа и активностите на опозицијата, која со иста реторика ја напаѓа власта, обвинувајќи ја за врска со криминалот и дрогата. Власта од друга страна пак обвини дека мотивот на опозицијата е да се спаси од правдата за нивните криминални дејствија во минатото.
Од друга страна, албанската опозиција од минатата година беше јавно обвинета и за големата поддршка што ја ужива од руските олигарси и фантом компании со руски капитал. Една истражувачка сторија, спроведена од авторите Дејвид Корн, Хана Вевинтова и Ден Фридман, фрла светлина врз тајните врски на Демократската партија со компании за лобирање. Во исцрпниот напис објавен во март, 2018 година, се откриваат докази според кои седиштето на демократите искеширало големи пари за промоција на нивниот лидер Лулзим Баша во САД. Според текстот кој го пренесоа албанските медиуми, првиот демократ во Албанија склучил договор со еден републикански лобист и заменик помошник во кампањата на Доналд Трамп чие име Ник Музин. Договорот меѓу Музин и Демократската партија е потпишан од Лулзим Баша, претседател на демократите, за промоција на демократската партија во месеците март, април и мај. Според договорот, наградата за Музин изнесувала 25.000 долари за овој временски период од неговите активности.
Во истражувањето понатаму се открива дека, пред една година, една фантомска шкотска компанија “Biniatta Trade” создадена од две нафтени компании со седиште во Белизе, го платиле токму Ник Музин да ѝ помага на Демократската Партија на Албанија за промоција во САД.
“Главното прашање е кој ги финансира обидите на Музин во САД да ѝ помага на Демократската партија на Албанија? Доказите кои ги имаме докажуваат едно опасно сценарио: фирмите поврзани со Русија влегуваат во криумчарски манири во Вашингтон, во обид да поттикнат промена на (политичката) агенда во Албанија“ – се вели во истражувањето.
Американското разузнавање минатата година излезе со заклучок дека Путин интервенирал во американските претседателски избори во 2016 година преку тајни и подземни операции. Специјалниот обвинител Милер, кој го истражуваше овој случај, подигна обвинение за 13 руски државјани.
Во тужбата тој пишува дека Москва преземала пропагандистичка кампања со цел да влијае врз изборниот процес и да му помогне на Трамп преку социјалните мрежи.
Но феноменот “Biniatta Trade-Shqiperi” е едно предупредување дека руската подземна војна ќе продолжи и подлабоко” – се открива во истражувањето.
Во истражувањето се изнесуваат и тврдења дека на ист начин се финансира и средбата и сликањето на претседателот на демократите, Лулзим Баша, со претседателот на САД, Доналд Трамп.
По објавувањето на ова истражување, реагира и Демократската партија и руската амбасада во Тирана. И првите и вторите ги отфрлија обвинувањата. Демократите рекоа дека овие се сценарија креирани од владејачката Социјалистичка партија, а Амбасадата на Русија додаде дека нивната држава не се меша во внатрешните работи на другите држави.
Но тоа што најмногу ги засилува сомнежите за врската меѓу опозицијата во Албанија со руски структури или олигарси е и начинот на делување кој не се разликува многу од дејствијата во Македонија, 2017 година. Последниве денови во Тирана се регистрираат многу насилни протести, како и обиди на демонстрантите за влез во Собранието на Албанија, слично како на 27 април 2017 година, кога насилниците влегоа во македонското собрание во Скопје. Во тоа време, се откри и присуството на српски разузнавач, а имаше многу сомненија, но и докази и изјави за влијанието на руски структури во тој период и потоа. Во Македонија се формира и политичка партија која се прогласи за сестринска на владејачката партија во Русија.
Фотографија во прилог на текстот: од насилните протести во Тирана, демонстрантите се обидуваат да влезат во албанскиот парламент
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.
