На 1.679-от ден од целосната руска инвазија врз Украина, руските напади продолжија и во текот на ноќта меѓу 28 и 29 септември, со удари врз Кијив, Одеса и повеќе украински региони. Украинските власти јавија за напади со балистички ракети и беспилотни летала, оштетени станбени згради, образовни објекти, железничка и енергетска инфраструктура, како и нови прекини во снабдувањето со електрична енергија.
Амбасадорката на Украина во Северна Македонија, Лариса Дир, во објава на платформата X предупреди дека украинските градови и општини практично непрекинато ги отстрануваат последиците од руските напади.
„Практично непрекинато траат активностите за отстранување на последиците од руските напади во градовите во 🇺🇦 и општините. Државата-терорист рф и дење и ноќе напаѓа луѓе, станбени згради, болници и образовни установи – нападите намерно се насочени кон исклучиво цивилни објекти“, објави Дир.
Практично непрекинато траат активностите за отстранување на последиците од руските напади во градовите во 🇺🇦 и општините. Државата-терорист рф и дење и ноќе напаѓа луѓе, станбени згради, болници и образовни установи – нападите намерно се насочени кон исклучиво цивилни објекти. pic.twitter.com/YaH4SXPtx5
— Larysa Dir (@dir_larysa) September 29, 2026
Во Кијив, рускиот агресор изврши напад со балистички ракети и дронови. Според украинската Државна служба за вонредни состојби, едно лице е повредено во Холосијивскиот реон, каде шесткатна станбена зграда била погодена, а десет жители биле евакуирани. Во Соломјанскиот реон биле оштетени две куќи, додека претходно градските власти јавија и за погоден објект на образовна установа и пожар на покрив на станбена зграда.
Претседателот Володимир Зеленски соопшти дека агресорот ги погодил депото на железничката станица Кијив-Пасажирски, дата-центри, деловни центри и станбени згради. Во Одеската област биле оштетени образовна установа, студентски дом и два странски трговски брода. Под напад биле и Кијивската, Днипропетровската, Харкивската, Сумската, Донецката, Запоришката, Житомирската, Волинската и Ривненската област, каде биле погодени енергетски објекти, трафостаници, цивилни претпријатија и домови.
Последиците од нападите врз енергетскиот сектор се почувствуваа во пет области. Украинското Министерство за енергетика соопшти дека дел од потрошувачите во Виничката, Житомирската, Донецката, Сумската и Харкивската област останале без електрична енергија поради руските напади врз енергетската инфраструктура. Во исто време, руските сили погодиле и железнички инфраструктурен објект во Виничката област, при што повеќе од 15.000 потрошувачи останале без струја.
Зеленски изјави дека Украина успеала да пресретне дел од руските балистички ракети со кои беше нападнат Кијив и им се заблагодари на американските и норвешките партнери за системот NASAMS и пакетот ракети, како и на Франција и Германија за новата поддршка за противвоздушна одбрана. Тој нагласи дека, во услови на секојдневна руска ескалација, „заштитата на животот“ мора да добива континуирана поддршка.
Новите напади се надоврзуваат на ударите од 28 септември, кога руски дрон ја погоди зградата на Националната академија на науките во центарот на Кијив, а во целата земја, според Reuters, загинале најмалку девет лица и биле повредени повеќе од 80. Во Днипро, удар врз деловен центар уби три лица и повреди 19.
Џ. Дерала
