Дерала, ЦИВИЛ: Во фото-финишот на референдумскиот процес за набљудувачите на ЦИВИЛ е многу важно уште еднаш да прочитаат и најстрого да се придржуваат кон кодексот на набљудувачите, кон повелбата што ја потпишаа на семинарите на ЦИВИЛ и, се разбира, да се придржуваат кон Изборниот законик. Постојат правила кои ние не смееме да ги заобиколиме во ниту еден момент.
Набљудувачите на ЦИВИЛ се пријателки и пријатели на овој процес. Тие се соработници и тие треба да го поддржат процесот и, секако, да бидат неутрални, непристрасни, објективни набљудувачи на овој процес .
Правото на глас, и овој пат, како и во секој друг изборен процес е најважно. И тоа е нешто што ние како организација за човекови права и слободи го браниме и се обидуваме да го застапиме во најдобра можна форма.
Набљудувачите на ЦИВИЛ се насекаде низ Македонија. Тие имаат прецизни упатства за тоа како и што треба да набљудуваат. Во нивниот фокус се, се разбира, институциите, избирачките одбори, како и сите оние структури кои на денот на гласањето може да се обидат да го попречат гласањето или да извршат било каква нерегуларност. Тоа е потребно веднаш да се нотира и да се пријави во прес и аналитичкиот центар во Скопје.
ЦИВИЛ ќе биде во постојана комуникација со сите граѓанки и граѓани, со институциите, со релевантните институции, а се разбира и со Државната изборна комисија во текот на целиот ден на гласањето.
По завршувањето на гласањето во 19 часот ЦИВИЛ ќе отвори дебата, ќе покани експерти, ќе покани претставници од своите мониторинг тимови и во живо ќе пренесува панел дискусии кои ќе го оценат референдумскиот ден и ќе се обидат да придонесат кон разбирање на она што се случуваше во текот на денот.
Се разбира во текот на денот, почнувајќи од 6 часот наутро, па се до полноќ, ЦИВИЛ ќе го мониторира и ќе го раководи од својот прес и аналитички центар во хотел Сити Парк. Оттаму ќе издава соопштенија и ќе држи прес-конференции во текот на целиот ден. Очекувам дека на планот ќе бидат конференции од 10 часот, а потоа на секои два часа ќе се вклучуваме во живо до затворањето на избирачките места, односно, гласачките кутии.
Тоа што е многу важно во овој момент е граѓанките и граѓаните да бидат отворени во комуникацијата со ЦИВИЛ и без никакви двоумења да се јават во организацијата во која имаат доверба и да ги пријават нерегуларностите, притисоците и заканите. Тоа можат да го направат по телефон, но исто така, и на веб-страницата на slobodniizbori.info. Но, се разбира можат да дојдат и лично во хотел Сити Парк и таму да известат и да сведочат за тоа што го виделе на терен.
Маја Ивановска
Камера: Атанас Петровски
Монтажа: Владо Крстевски
