Порастот на цените и продлабочувањето на економската криза се реална закана за Македонија, оцени Џабир Дерала, претседател на ЦИВИЛ, во емисијата „24 анализа“ за војната на Блискиот Исток и нејзините економски импликации.
„Битно е во овој момент да бидеме попозитивни, затоа што ситуацијата ескалира од ден на ден. Треба да бидеме добронамерни и да побараме од оние што се на одговорни позиции во државата да престанат со популизам и калкулации, туку вистински да седнат и да донесат мерки кои барем минимално ќе ги ублажат ефектите од оваа криза“, апелира Дерала.
Тој својот став во кој повика на единство и солидарност го поткрепи со предупредувањето дека оваа криза не е единствената, но и дека следат нови.
„Таа (војната во Иран) не е единствена. Следат нови. Ние мораме да размислуваме за солидарно поврзување за да може да се соочиме со последиците од она што нè очекува. Иран е денеска. Утре ќе биде нешто друго. Постојните и претходните конфликти се исто така влијателни и не смееме да ги заборавиме“, изјави Дерала. Тој во текот на емисијата говореше и за војната на европско тло – Украина – која влезе во својата петта година.
Што се однесува до економијата, според Дерала, ценовните шокови што доаѓаат како последица на глобалните кризи, вклучително и актуелната војна во Иран, силно се чувствуваат и во македонската економија. Според него, оваа ситуација бара сериозен и одговорен пристап, наместо политички калкулации.
„Што и да направи која било влада, ќе има негативни ефекти, но тоа не значи дека институциите треба да кренат раце. Напротив, токму сега е моментот за конкретни чекори“, истакна Дерала.
Тој нагласи дека Владата и коалициските партнери располагаат со доволно експертски капацитети и економисти кои можат да понудат решенија, но дека е неопходно да се напушти популистичкиот пристап.
„Потребно е да престане популизмот и да се донесат мерки што барем минимално ќе ги ублажат ефектите од кризата“, рече тој.
Дерала предупреди дека актуелната криза не е изолиран случај, туку дел од поширок глобален контекст кој најавува нови предизвици.
„Ова не е единствена криза. Следат нови. Денес е Иран, утре може да биде нешто друго. Постоечките конфликти и понатаму имаат сериозно влијание и не смееме да ги игнорираме“, додаде тој.
Во таа насока, Дерала повика на поширок општествен консензус и координација меѓу сите релевантни актери во државата.
„Имаме обврска – како јавни интелектуалци, медиуми, граѓанско општество, власт и опозиција – да седнеме на иста маса и да изработиме стратегии за справување со периодот што доаѓа“, нагласи тој.
Според Дерала, земјата влегува во нестабилен период кој може да прерасне во сериозна криза доколку не се реагира навреме.
„Влегуваме во период на хаос. Ако не направиме ништо, тој хаос ќе не поклопи уште на самиот почеток“, предупреди Дерала.
Тој истакна дека е потребна и поголема солидарност во општеството, како и креативен пристап во креирањето политики.
„Мораме да размислуваме и за солидарно поврзување, да бидеме оригинални и креативни – можеби дури и да дадеме пример надвор од земјата“, заклучи Дерала.
Уредничка на емисијата е Билјана Секуловска, а во неа гостуваа и проф. Мерсел Билали и новинарот Мирче Адамчевски.
Б. Јордановска
