Интернет порталот Трн.мк објави интервју со претседателот на ЦИВИЛ, Џабир Дерала, под наслов „Да се издржи, да се држи главата исправено и да се продолжи со борбата“ (линк). Издвојуваме едно прашање и еден одговор од ова обемно интервју со голем број прашања поврзани со професионалниот, јавниот и личниот живот на нашиот колега.
Меѓу другото Трн.мк го праша Дерала како гледа на сегашната состојба на човековите права во Северна Македонија.
„Веќе сега е очигледно дека човековите права и слободи се под силна закана. Ние веќе се соочуваме со постепено ограничување, а нè очекува и сè позабрзано и флагрантно газење на човековите права и слободи како на индивидуално, така и на ниво на заедници, а секако и на ниво на целото општество“, одговори Дерала во интервјуто за Трн.
Според него, социјалната правда, како една од најважните области на човековите права и слободи, правото на образование, на здравствена заштита, на правично судење – веќе сега се гледа дека ќе бидат силно предизвикани од политиките и практиките на власта.
„Дискриминацијата по етничка и верска основа се најдобрите алатки во рацете на една авторитарна власт да ја одржува и да ја зголемува својата моќ, преку сеење страв и недоверба, а потоа покажување мускули и играње улога на ‘заштитник и спасител’. Оваа област – меѓуетничките и меѓуверските односи – ќе биде изговор за сите неуспеси на план на социјалните прашања и благосостојба на граѓанките и граѓаните“, изјави Дерала за Трн.
Тој предвидува дека наскоро ќе се продлабочи маргинализирањето на повеќе општествени групи.
„Имајќи предвид со какви конзерви си имаме работа, ќе видиме продлабочено маргинализирање на повеќе општествени групи. Исто така, родовата нееднаквост ќе се зголеми, а на сметка на тоа ќе се промовираат лажни вредности поврзани со лажна грижа за семејството, според принципите на верските догми напуштени во нормалниот свет веќе со векови“, алармира соговорникот на Трн.
Понатаму, според Дерала, изолационизмот, растечката сиромаштија и тензиите во повеќе области ќе придонесат кон општа дестабилизација на земјата. Во такви услови, смета тој, почитувањето на основните човекови права и слободи ќе стане далечен сон.
„И пази, сево ова е само брз поглед на нештата. Да не зборувам за слободата на говор и медиумските слободи, владеењето на правото, безбедноста и сигурноста итн.“, вели Дерала за Трн.
М. Д.
Трн.мк е интернет медиум што промовира општествени и културни вредности, зелени политики, технологии, човекови слободи, здрави начини на живот, праведност, хуманост и креативност.
