„Тезата на генералниот директор на Хуман рајтс воч, се провлекува веќе од минатата година. Тоа е на некој начин продолжување на еден позитивен тренд кој го согледува ХРВ, за разлика од тоа што го гледаат другите, би рекол, речиси сите други релевантни невладини организации за човекови права во светот. Се работи за тоа дека, според него, има огромен демократски потенцијал кај граѓанките и граѓаните низ целиот свет, и смета дека тоа е еден потенцијал кој во една многу догледна иднина ќе го сопре трендот на автократизирањето во државите, вели претседателот на ЦИВИЛ, Џабир Дерала, во однос на годишниот извештај на Хјуман Рајтс Воч, во емисијата Утрински брифинг.
„Директорот на ХРВ исто така во извештајот забележува, а тоа исто така го забележа и мојот колега Мишев во ЦИВИЛ МЕДИА вчера, дека на демократските лидери често им се случува, притиснати од големите неволји, како што е пандемијата други процеси, да кокетираат со популизмот, и притоа да ги заборават своите основни задачи, а тоа е да ги исполнат очекувањата, надежите, да ги заштитат граѓанките и граѓаните од загрозувањето на човековите права, и тоа е одличен апел до нив, впрочем еден притисок врз нив, Хјуман рајтс воч не е детска играчка. Верувам дека тоа ќе ги охрабри покатегорично да се борат за заштита на човековите права. Инаку, самиот извештај содржи сериозни анализи на состојбите во повеќе од сто земји во светот, добра вест е што Северна Македонија не се наоѓа меѓу нив. Северна Македонија е спомната во ХРВ оваа година, меѓу другото дека има свој претставник во тело на ОН, кое се занимава со човековите права, во Шри Ланка, на пример, што е ете, мал куриозитет, но исто така е спомната и во други делови на ХРВ оваа година и крајот на минатата, затоа што се уште се влече опашката на соработката на државните власти со ЦИА, односно со тајните затвори низ светот. Ние сме една од државите, во случајот со Ел Масри, беше ставена на таа листа. Се уште се влече, се уште има постапки од таа смисла, така што, еве, тука можеме да илустрираме на некој начин…
Без оглед на тоа која гарнитура е на власт во една држава, едноставно, тоа е државата. ХРВ нас не гледа како држава, не како влада или поединечна, една или друга. И таа опашка ќе се влече уште долго, треба да се биде внимателен, без оглед на тоа, кој е на власт, треба да биде внимателен, да не става црни петна на имиџот на државата. Добро е што ХРВ препознава дека ние, како држава, оваа година нема потреба да бидеме во нивниот извештај како посебно поглавје, што не беше случај до пред добри пет години. На пример, во 2016 година ние сме меѓу посериозно анализираните држави со низа проблеми, пред се слободата на изразувањето, меѓутоа и владеењето на правото, кршењето на човековите права во низа други области.“, посочува Дерала.
Во однос на извештајот на ХРВ што се однесува и до демократските земји како што се САД, Дерала вели дека е особено важно што токму за САД извештајот е жесток, бидејќи како што е познато, се однесува на состојбите со човековите права за време на Трамповиот мандат.
“Тоа што се случувало кон крајот на мандатот на Трамп, е фрапантно, и јас препорачувам да се прочита барем тоа поглавје. Интересно е тоа што на Балканот, Србија Косово и Босна и Херцеговина се застапени во тој извештај, за Грција се зборува постојано, години наназад во ХРВ, за нивниот однос кон мигрантите. Во 2016 година и ние бевме застапени со сериозни проблеми за начинот на справување со мигрантската криза. Едноставно, кога се работи за мигрантска криза, како што гледате, тие сега се „вепонизираат“, односно самите мигранти стануваат оружје на војната во последно време, ете на Полската граница… Работата е во тоа што кога зборувате за мигранти, едноставно, нема систем што може да ги истретира како што треба. Тоа е предизвик пред кој може да потпишете прво капитулација, потоа да гледате да не направите нешто што се нарекува катастрофа.“
„Би сакал да кажам дека не треба да не радува фактот дека нас не нема во ХРВ премногу, затоа што може лесно да се најдеме во такви извештаи, ако се опуштиме. Демократијата е нешто кое ние мораме постојано и да го негуваме, и да го унапредуваме, бидејќи никогаш не е доволно од демократија“, порача на крајот Дерала.
Д. Т.
