Се очекува десетици европратеници да присуствуваат на маршот на Прајдот во Будимпешта овој месец, пркосејќи ми на унгарскиот премиер Виктор Орбан, кој се обиде да го забрани настанот.
Како што пренесува Гардијан, во дебатата во Европскиот парламент во Стразбур, европратениците од либералните, левичарските и зелените групи ветија дека ќе бидат во Будимпешта на 28 јуни за парадата за да покажат солидарност со геј Унгарците.
Ветувањата дојдоа откако градоначалникот на градот изјави дека настанот ќе се одржи, заобиколувајќи го законот што ѝ дозволува на полицијата да ги забрани ЛГБТК+ маршовите. Гергели Карачони во понеделник изјави дека маршот ќе биде општински настан – и прослава на слободата – па „не се потребни дозволи од властите“.
„Во овој град нема граѓани од прв или втор ред… ниту слободата, ниту љубовта не можат да бидат забранети, а не може да биде забранет ниту Прајдот во Будимпешта“, рече Карачони.
Ираче Гарсија Перез, шпанската лидерка на социјалистичката група во Европскиот парламент, им се обрати директно на геј луѓето во Унгарија за време на дебатата во среда:
„Ве гледаме, ве слушаме и на 28 јуни ќе маршираме со вас во Будимпешта, рамо до рамо, горди и гласни“.
Тинеке Стрик, холандска европратеничка од редовите на зелените, која неодамна предводеше делегација од пратеници во Унгарија, рече дека таа и 70 европратеници ќе бидат во Будимпешта.
„Јас и 70 колеги ќе го направиме она што комисијата нема да го направи. Ќе дојдеме на Прајдот. Ќе им покажеме на Унгарците дека не се сами“.
Градоначалничката на Амстердам, Фемке Халсема, и помлад холандски министер, исто така, изјавија дека ќе присуствуваат на настанот, според локалните медиуми.
Европскиот комесар за демократија и правда, ирскиот политичар Мајкл Мекграт, кој учествуваше во дебатата, не одговори на повторените барања да се придружи на настанот во Будимпешта.
Мекграт потврди дека комисијата го испитува унгарскиот закон што ги забранува маршевите на Прајдот поради неговата компатибилност со правото на ЕУ и одредбите за основните права.
„Европската комисија е подготвена да ги употреби сите свои алатки за да обезбеди почитување на правото на ЕУ низ целата наша унија“, рече тој.
Комисијата веќе презема правни мерки против Унгарија поради законот од 2021 година со кој се забранува ЛГБТК+ содржина во училиштата и телевизијата во ударен термин, што значи дека учениците кои се прашуваат за својата сексуалност не можат да добијат помош, додека емисиите или рекламите што одразуваат теми за толеранција може да бидат невозможни за емитување во текот на часовите со најголема гледаност.
Д. Мишев
