Во Сараево викендов се одржа регионалната конференција „Геополитички промени и положбата на Бошњаците во Западен Балкан“, во организација на центарот за геополитички истражувања “Геопол“.
Конференцијата ја отвори Адмир Лисица, директор на „Геопол“, а ја модерираше Лариса Омерчиќ, новинарка на порталот „Одговор!“ На конференцијата говореа Џелал Хоџиќ, претседател на СДА Македонија, Кенана Струјиќ-Харбиќ, пратеничка во Собранието на Црна Гора, Мирсад Нурковиќ, потпретседател на Собранието на Црна Гора, како и Ахмедин Шкријељ, пратеник во Собранието на Србија.
ЦИВИЛ МЕДИА побара изјави од директорот на „Геопол“, Адмир Лисица, како и од претставникот од Северна Македонија, Џелал Хоџиќ.
„Босна и Херцеговина никогаш не била надвор од глобалните политички превирања – ниту во времето на Берлинскиот конгрес, ниту денес. Истото важи и за целиот Западен Балкан. Тука започна Првата светска војна, а ниту падот на Железната завеса не го заобиколи регионот. Наместо стабилност, следеа агресија врз Босна и Херцеговина и крвавите војни во поранешна Југославија. Денешната ситуација повторно нè потсетува дека без сопствена сила и капацитет, остануваме ранливи. Затоа, неопходно е да ги зајакнеме нашите ресурси – и како Бошњаци во Босна и Херцеговина и како Бошњаци надвор од регионот“, изјави директорот на Геопол, Адмир Лисица, специјално за ЦИВИЛ МЕДИА.
Хоџиќ во својата изјава за ЦИВИЛ МЕДИА ја истакна улогата на актуелната влада во контекст на евроинтеграциите.
„Северна Македонија и Босна и Херцеговина немаат дилема околу својата стратешка ориентација – НАТО и ЕУ се единствениот пат. Бошњаците во Северна Македонија се целосно интегриран дел од општеството, присутни и успешни во сите сфери. Но денес, најголемата пречка не е недостаток на капацитет, туку политичкиот курс на Владата предводена од Мицкоски, која свесно го блокира европскиот пат на државата. Под засилено влијание на авторитарни центри како Вучиќ и Орбан, оваа политика ја оттурнува земјата од Европа и ја влече наназад. Концептот на ‘српски свет’ одамна не е само реторика – неговото штетно влијание врз Северна Македонија е јасно нотирано и во европските извештаи за напредокот“, изјави од Сараево Џелал Хоџиќ, претседател на СДА Македонија, за ЦИВИЛ МЕДИА.
Конференцијата предизвика силно внимание во Босна и Херцеговина и во регионот, потврдувајќи дека прашањата што ги отвори не се маргинални, туку суштински за иднината на Западен Балкан.
Џ. Д.
