Државната изборна комисија (ДИК) денеска на седница едногласно ги потврди кандидатурите за претседател на Република Северна Македонија 2024 година поднесени од Стево Пендаровски поддржан од СДСМ, Стевче Јакимовски поддржан од ГРОМ, Максим Димитриевски од партијата ЗНАМ, Арбен Таравари од албанската опозициска коалиција Вреди, Билјана Ванковска Цветковска од Левица, Бујар Османи од ДУИ и Гордана Силјановска Давкова од ВМРО-ДПМНЕ.
Претседателот на ДИК, Александар Даштевски информира дека кандидатите Јакимовски и Таравари во рок од 48 часа треба да доставаат единствен даночен број и трансакциска сметка.
Даштевски соопшти дека сите кандидатски листи за претседател на државата се доставени навремено.
Од друга страна, во однос на парламентарните избори, листите на кандидати за пратеници во Собранието, овластените претставници на предлагачите треба да ги доставуват до ДИК најдоцна до 2 април.
Членот на ДИК, Бобан Стојаноски истакна дека согласно член 160 од Изборниот законик до ДИК било доставено барање за акредитирање на набљудувачи од ОБСЕ/ОДИХР – Канцеларијата за демократски институции и човекови права за 34 акредитации со список на набљудувачи кои уредно се доставени до ДИК за набљудување на изборите за претседател и изборите за пратеници. Членовите на ДИК едногласно го усвоија ова барање.
Шефот на мисијата на ОБСЕ/ОДИХР, амбасадорката Џилијан Стрик денеска на прес-конференција информираше дека по покана од властите во земјава ја отвори набљудувачката мисија за претседателските и парламентарните избори кои ќе се одржат на 24 април, односно на 8 мај.
