Фантастично добро платената и супер партизираната Државна изборна комисија молчи точно пет месеци по срамниот неуспех да придонесе кон спроведување слободни избори. Наместо да биде дел од решението, ДИК (о)стана најголем дел од проблемот.
Според измените во Изборниот законик, ДИК имаше највисоки овластувања од кој било состав порано. Не искористи ниедно овластување да ги спречи тешките изборни нерегуларности и злоупотреби, наспроти бројните пријави од граѓанките и граѓаните, наспроти обемните извештаи и безбројни повици од ЦИВИЛ.
ДИК не го прочисти Избирачкиот список. Кога голем број гласачи без избришани од Избирачкиот список, на само два дена пред изборите на 11 декември, не презеде никакви мерки и не даде одговор на прашањата зошто и како дошло до тоа. Со тоа и со низа други постапки, ДИК грубо го повреди гласачкото право на илјадници граѓанки и граѓани, како што констатираат експертите Александар Новакоски и Драган Зелиќ (ГОНГ, Хрватска).
Ако за ништо друго, составот на ДИК треба да поднесе оставка барем за тоа, да се подложи на темелна истрага и да понесе одговорност. Да има здрава институција во земјава, сигурно нема лесно да помине.
ДИК калкулираше со броењето на гласачките ливчиња. Не даде одговор на прашањата за рекордниот број од 38,000 неважечки ливчиња. Два дена по изборите молчеше за суштински прашања кои се однесуваат на изборните резултати. Сè може да се случи за два дена.
Телата на ДИК – избирачките одбори и општинските изборни комисии направија стотици (не)намерни грешки во процедурите и го прекршија Изборниот законик во многу од случаи.
Политичките партии на опозицијата не ги зедоа предвид доказите и извештаите на ЦИВИЛ за тешките злоупотреби и со ништо не се обидоа да ги употребат во аргументацијата пред ДИК. Не направија многу за да им ги затнат муцките на криминалците што држеа експлицитни фашистички говори пред седиштето на ДИК во одбрана на својот пораз.
Пред некој ден, ДИК упати јавен повик за проверка на податоците во Избирачкиот список. Пак ли ќе се подбиваат со луѓето? По сè што (не) направија, единствено што преостанува на менито за ДИК се оставки, истрага и одговорност, а не уште еден циркус од избори.