Неодамна ЦИВИЛ објави информација, а во контекст на трошење јавни пари на Државната изборна комисија, дека според анонимни извори, два члена на избирачки одбори на изборите во 2014 година, сѐ уште не се исплатени и дека според нивните изјави тие не се единствените кои останале без надоместок за завршената работа.
Уште една потврда за она што ЦИВИЛ го зборуваше за лошото менаџирање со јавните пари во ДИК, е сведоштвото на Сузана Талимџиоска-Чурлиноска, претседател на и.м. 1405 во Прилеп, на парламентарните избори во 2016.
„Државната Изборна Комисија за парламентарните избори во декември 2016 година во 154 избирачки места во Општина Прилеп, при исплата на надоместокот на членовите на избирачките одбори, не го исплати надоместокот за гласање на болни и немоќни лица, ден претходно. Според Правилникот за надоместоци се плаќа половина од сумата предвидена за денот на избори, односно за претседателот 1.500 денари.“, изјави Талимџиоска-Чурлиноска.
Според неа, членови на ВМРО-ДПМНЕ ја известиле дека се работи за казна поради предноста на СДСМ во Прилеп.
„Меѓутоа, во меѓувреме се допишував со Добре Јанчев, Генерален секретар на ДИК, кој ми одговараше дека сè уште во некои општини вршат исплата на средства за денот на изборите и дека потоа ќе бидат исплатени и овие средства, и јас му верував“, вели Сузана.
За потсетување, едно од барањата за информации од јавен карактер на ЦИВИЛ, се однесуваа конкретно на поединечно исплатените награди, односно хонорари или бонуси на членовите на Државната изборна комисија, 9-те члена, вклучително и Претседателот и неговиот заменик, но и на висината на нивната плата и тоа за 2016 и 2017 година.
„Јас бев претседател на избирачкиот одбор на и.м. 1405 и само кај нас имаше 5 лица кои гласаа ден пред изборите, за што бевме ангажирани 5 члена на избирачкиот одбор, па тоа помножете го со 100 (ако претпоставиме дека во сите и.м. немало болни лица)… Можеби со тие пари ги купиле телефоните… Ако телефоните не се информации од јавен карактер, каква информација е тоа што државата преку ДИК им должи пари на своите членови за завршена работа“, прашува Талимџиоска- Чурлиноска.
Револтирана од она што се случува и третманот на ДИК, пред сè кон луѓето што биле ангажирани за спроведување на лице место на изборите, таа вели дека нема да запре тука, однсоно информациите ќе ги испрати и до Бејли.
Биљана Јордановска