„Стратегиската определба на Македонија за влез во НАТО, како мултиетничко општество е кохезивен, обединувачки фактор. Македонија стои цврсто на патот да ги имплементира сите реформски процеси и највисоки демократски стандарди, со цел – целосно да се изгради во модерна европска демократија, во одговорен, активен чинител – партнер во меѓународните односи и фактор на стабилност во регионот и пошироко“, порача македонскиот министер за надворешни работи, Никола Димитров, во своето обраќање на конференцијата „Република Македонија кон полноправно членство во НАТО“, што се одржа денеска во Министерството за надворешни работи.
Според македонскиот шеф на дипломатијата, сите процеси на вклученост и посветеност на Македонија, придонесуваат за поддршка на целокупниот одбранбен и воен капацитет на Алијансата.
„Како земја која што се гледа себеси како членка на Алијансата во наредниот период, ќе го зголемиме своето учество во меѓународните мировни мисии за 20 проценти, а буџетот за одбрана ќе го зголемиме за референтни 0.2% секоја година, со желба од сегашниот 1% од БДП, до крајот на мандатот на оваа Влада, да стигнеме до 1,7 -1,8 %. На регионален план, како актуелни претседавачи со Јадранската повелба и со групата за безбедносна соработка во Југоисточна Европа, во рамките на НАТО, интензивно работиме на квалитетно финализирање на зацртаните активности за 2017 “, рече Димитров на конференцијата.
Тој порача дека НАТО треба да продолжи со својата политика на „отворени врати за земјите за Западен Балкан“, пред сè, за Македонија. Алијансата не смее да дозволи кој било да прави пречки на иднината на Балканот како дел од трансатланскиот свет“, рече Димитров.
Тој се осврна и на актуелните безбедносни ризици со кои се соочува светот, а како што рече, нашиот регион бил, и е изложен на можен насилен екстремизам и радикализам. Сегашните ризици за стабилноста на Балканот, според него, не се само традиционални, туку политички, економски, информатички и информативни, со постојани обиди за мешање.
Според амбасадорот на САД, Џес Бејли, кој ја истакна поддршката на САД, иако во последниот период во Македонија, регионот, дури и во САД се случија значајни политички промени, сепак три работи остануваат исти.
„Прво, НАТО останува суштина на трансатланската безбедност, второ, НАТО сојузниците остануваат посветени на Алијансата и сѐ повеќе инвестираат во безбедноста и одбраната, и трета работа што не е променета е дека Македонија стратегиски работи на членство во НАТО. Ја поздравуваме новата енергија и подготвеност за реформи. САД остануваат партнер на Македонија. Процесот може да се подели на три области. Македонија мора да продолжи со итниот процес на реформи, зашто слабите институции и невладеењето на правото ја поткопуваат стабилноста. Новата Влада има амбициозен план за реформи, а ние се залагаме да работиме заедно со Македонија, за да ги спроведе тие реформи“, рече амбасадорот Бејли, акцентирајќи дека Македонија мора да продолжи и со модернизација на Армијата и со градење на добрососедски односи.
Според амбасадорот на Германија, Томас Норберт Герберајх, последните тензии на релација Македонија –Србија, коишто по дипломатската комуникација се разјаснети, покажуваат колку е битно да се работи на полето на мирна соработка. А, причините за овие случувања ги лоцираше во постоечкиот национализам, економската нестабилност, присуството на коруција…
„Сакам да ја потврдам нашата поддршка за членството на Македонија во НАТО. Македонија, земјите во регионот мора да ги исполнат реформите за членство во НАТО“, порача амбасадорот Герберајх.
Моника Талеска
Камера: Дехран Муратов
Монтажа: Даниела Нисева
