ЦИВИЛ – Центар за слобода ги додели наградите за фебруари и март, на најуспешните новинарки и новинари од вториот циклус на проектот „Граѓански објектив“, за сториите што зборуваа за изборен поткуп, за неисполнети предизборни ветувања, за иселување на младите, за злоупотреба на малолетниците за политички цели и за ширење на пропаганда.
Сведоштво за поткуп на гласачи, е првонаградена сторија за изборен поткуп од денот на предвремените парламентарни избори одржани на 11 декември 2016 година.
Граѓанскиот новинар сакаше да остане анонимен со оглед на сензитивноста на видео сведоштвото. Поради верификацијата на информациите што содржеа и имиња на луѓе кои се инволвирани во поткупот на гласачи, оваа сторија е објавена по три месеци од завршувањето на изборите.
Второнаградениот видео прилог Ѓуроски: Градот на државни прваци во пливање, без градски базен, заеднички го подготвија Горан Карафилоски и Амдија Емини од Кичево и Емин Рустемовски и Елзана Кадриеска од Струга.
Постмодерна варијанта на „Парите се отепувачка“, прилог што го подготвија Ана Ѓеорѓиева од Валандово и Леонид Баламов и Симеон Томов од Гевгелија, беше третонаградената сторија од жири-комисијата, на тема – иселувањето на младите од земјата.
Националистичка пропаганда на радио емисија пуштена во градски автобус на ЈСП е тема на видео прилогот што го испрати граѓански новинар кој сакаше да остане анонимен.
ЈСП бесплатно ја вози пропагандата на ВМРО – ДПМНЕ!, како четвртонаграден прилог, укажува дека возачите на ЈСП со пуштање на вакви националистички, пропагандни емисии, како што оценуваат граѓанките и граѓаните, се директни поттикнувачи на меѓуетнички инциденти меѓу младите во автобусите.
Втората четврта награда жири комисијата ја додели на фото сторијата Политичка мобилизација на малолетници среде настава, а добитникот, исто така, сакаше да остане анонимен.
Фотографијата што ни ја испрати, всушност, е соопштението кое средношколците го читале на часовите, како мотивација за приклучување на протестите „За заедничка Македонија“.
Тие што имаат снимка, фотографија или сторија за изборните нерегуларности, за кршењето на гласачкото право, за злоупотребите, притисоците и заканите, за поткупот на гласачите можат да бидат дел од големото семејство граѓански новинарки и новинари кои соработуваат со ЦИВИЛ.
ЦИВИЛ ги охрабрува граѓанките и граѓаните да бидат активни чинители во општествените промени и надминувањето на медиумскиот мрак.
