од корнер: ЗОРАН ИВАНОВ
Жената, големиот и најчесто не разбран пријател на земјава, доскорешната германска европратеничка, актуелна шефица на женскиот дел на европските десни, на европските народни партии Дорис Пак, е на ден во Скопје. Во нејзините повеќекратни посети на Македонија, во детектирањето на нашите автентични состојби таа, како и досега, строга, критична, прецизна, принципиелна. Типично германски.
Гостинката, овој пат на жените политичарки на ВМРО-ДПМНЕ, пак отворена, директна и реално сурова. Макрон ја утна работата. Додека не омекне европското срце, Македонија мора да издржи и да ги турка реформите бескомпромисно. Судските процеси, исто така. Правото и правдата е европската врата, рече Дорис во Скопје.
Дотогаш накратко можете и во Евроазија, гримастично и со доза иронија порача таа, одговарајќи на новинарска сугестија, додавајќи дека на Македонија неизбежното местото ѝ е Европа.
Сублимирано, тоа се нејзините пораки од нејзината последна посета на Скопје.
Германката Пак не кажа најдиректно, но суптилно дипломатски во изјавите и во кусите интервјуа за неколкуте македонски редакции, по нашето откачување од страна на Макрон, малку нѐ подутеши дека францускиот шеф на галската држава не ѝ даде корпа само на земјава. Суптилно, метафорично ама итро му одговори на францускиот шеф на државата дека е лесно во аут да се истуркаат балканските велесили какви што се Македонија и Албанија.
Особено со неговото одважно не за Македонија, Макрон практично ја торпедираше и изморената Меркел. Но, во исто време, покрај сите други европски лидери и нивните политики на темава, ги дискредитираше и германската влада и германскиот Бундестаг. Можеби впечатоков е пресубјективен, но од тонот на нејзините изјави, од гестикулациите на нејзините раце, од трепетот на нејзините динамични очи, како да избиваше гнев за Макроновиот негаторски гест. Не само спрема државичките како Албанија и Македонија. Вклучително и спрема, во Унијата, великата Германија.
Па, Емануеле, помисли до наредната можност. Германкава дотогаш најверојатно повремено ќе те потсетува на курназлукот врз Македонија. А Германија со Меркел или и без неа, сеедно, сепак, не е Франција.
Дорис Пак, дојди пак.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 25.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.
Доколку некоја содржина е потпишана со ЦИВИЛ Тим за комуникации, тогаш преземањето е дозволено во целост.
