Граѓанската организација ЦИВИЛ – Центар за слобода денеска им го предаде изборниот извештај на ЕУ-диломатите од тимот на Јоханес Хан, но и документ со препораки и оценки за целокупната политичка состојба во Македонија и за неизоставната потреба од итно решавање на кризата, со цел Македонија да се врати во нормала.
„Нашите наоди им ги презентиравме на евродипломатите. Ја известивме Европската комисија, дека предвремените парламентарни избори во 2016 година претставуваат наследство на 10-годишното заробеништво на институциите и државата, на структурното насилство, на широко распространетата корупција и на кршењето на изборните стандарди во изборниот процес. Нив, во најголема мерка ги спроведуваа институциите, кои се сé уште под ингеренции на владејачките партии“, изјави Џабир Дерала, претседателот на ЦИВИЛ-Центар за слобода, по средбата со ЕУ-дипломатите, на денешниот настан „Без цензура и шминка“.
Како што им изјави на новинарите, Дерала им го посочил на членовите на тимот на Хан, процесот на злоупотреби на јавната администрација на локално и на централно ниво, им укажал на фактот дека тие „24 часа, секој ден мораа да одработуваат низа работи, кои беа во полза на политички, па дури и криминални структури“.
„ЦИВИЛ бара итно оставка на ДИК и истрага за сите членови и тела на оваа комисија. Имаме документи и докази, коишто говорат за низа прекршувања на законите и изборните процедури. Бараме ова тело вистински да се реформира, департизира и професионализира. Државната изборна комисија не успеа да ја спроведе својата функција, ги прекрши изборните процедури и доведе многу граѓани да не можат да го остварат своето гласачко право. Тие не беа обештетени, а штетите од лишување на право на глас, се големи“, акцентираше Дерала.
Тој и овој пат го истакна барањето на ЦИВИЛ, за продолжување на работата на СЈО, изразувајќи му безрезервна поддршка на Обвинителството. Ги повика корумпираните судии да се соочат со својата одговорност, поради штетите нанесени врз земјата и системот.
Дерала забележа дека нема судска разрешница за евидентираните кршења на законот од 27 медиуми, а ад хок телото ја заврши со својата работа на 12-ти декември, поточно 24 часа по гласањето, така што наодите на ова регулаторно тело, не ни можеа да бидат ефектуирани.
„Бараме итно да прекинат, да се стопираат сите форми на притисоци и закани по граѓанското општество. ЦИВИЛ денеска бара од сите политички структури да прекинат со притисоци, злоупотребии и врз социјалните случаи, да се престане со притисоци и закани врз интелектуалците, уметниците, вработените во сите сфери на општеството“, побара Дерала.
Став на ЦИВИЛ, како што рече Дерала е дека локалните избори треба да се одржат во редовен термин, но само со реформирана ДИК и со прочистен Избирачки список.
Моника Талеска
