„Со загриженост констатираме дека и покрај нашите апели до сите учесници во изборниот процес, да се воздржат од инволвирање на децата во кампањите, сепак, има случаи на злоупотреба на децата за партиско –политички цели“, изјави заменичката на Народниот правобранител, Васка Бајрамовска Мустафа, коментирајќи ги за ЦИВИЛ Медиа, последните случувања со злоупотреби на децата во кампањата за локалните избори.
„Разочарува фактот и од она што го гледаме во медиумите: и родителите како да се гордеат, излегувајќи заедно со своите деца, без оглед на нивната возраст, на митинзите и средбите со претставниците-кандидати за градоначалници. Оттука, како орган надлежен за заштита на правата на децата, ги повикуваме и родителите и политичките партии и другите учесници, да се воздржат, да не дозволат да се вклучат децата во кампањата, односно, децата да не се користат во политички спотови, билборди или на митинзите, како учесници во изборниот процес“, категорична е Бајрамовска Мустафа.
Како што ни изјави таа, вклучувањето на децата во политичка кампања е спротивно на Конвенцијата за права на децата, којашто обврзува децата да бидат заштитени од сите видови злоупотреби и манипулации. Таа посочува и на Декларацијата за заштита на детето од политичка манипулација, на Законот за заштита на децата, ина Законот за основно и средно образование, со коишто се забранува политичко организирање, дејствување со злоупотреба на децата.
Како орган за заштита на правата на децата, канцелариите на Народниот правобранител, вели Бајрамовска Мустафа, ќе продолжат да ги следат случувањата.
„Им порачуваме и на медиумите да не прифаќаат, ниту емитуваат платени политички програми, пораки, ако преку нив, се врши злоупотреба на децата за политички цели“, порачува заменичката-омбудсман.
Согласно Законот за семејство и Законот за социјална заштита, според неа, големи надлежности им се даваат на центрите за социјална работа, коишто треба итно да интервенираат кога ќе увидат дека има злоупотреба на децата.
„Зашто, најстрогата мерка која што може да се преземе во вакви случаи, имајќи го предвид најдобриот интерес на детето, е да поднесат барање за одземање на родителското право. Ние не сме за тоа – децата да не бидат информирани. Но, тоа треба да биде на поинаков начин, а не со инволвирање и на некој начин, пренесување на ставовите на родителите врз децата, што е спротивно на сѐ што е најдобро за детето“, заклучува заменичката-правобранител Бајрамовска Мустафа.
Моника Талеска
