Од 16 до 18 јуни во просториите на Македонската опера и балет и Детскиот театарски центар, ќе се оддржи четвртото издание на меѓународниот фестивал за детски театар „Фенер“, во организација на „Буден Театар“. Со мотото „Децата се важни“, фестивалот „Фенер“ го повикува македонското општество да го насочи фокусот кон децата и кон нивните потреби, не запоставувајќи ја важноста на културата во нивниот развој.
Фестивалот ќе биде отворен во петок од 18.30 во Детскиот театарски центар, со претставата „Црвенкапа“ од Бугарија, која нуди нов наратив на познатата бајка, акцентирајќи го односот меѓу децата и возрасните. Претставата „Топче“, на Театарот „Гриф“ од Унгарија, која ќе биде прикажана во сабота и недела од 11.00 часот во МОБ, е првата претстава наменета за „бебешка публика“ изведена во Македонија. „Пипи Долгиот чорап“ со која ќе се затвори фестивалот во 18.30 во МОБ, во изведба на „Градскиот куклен театар“ од Риека, Хрватска, ќе не потсети дека е важно да се биде свој и да се живее според сопствените критериуми.
„Буден Театар“, во сабота, од 18.30 на малaта сцена на МОБ премиерно ќе ја изведе „Меѓу нас“, авторската претстава на Милиана Ленак, инспирирана од делата на Ване Костуранов, а наменета за тинејџери и возрасни. Претставата жонглира со концептот за „сега“ и „некогаш“, преку односот на двајца луѓе кои некогаш биле блиски, и преку паралелата меѓу некогашното и денешното Скопје.
Дискусијата „Големи, мали, помали, најмили“ на која ќе зборуваат гостите поканети на фестивалот, се однесува на темата за диференцирање на детската публика според возраста.
Во соработка со УНХЦР ќе биде одбележан и Светскиот ден на бегалците, со претставата „Писмо некому“.
Насочен и кон поттикнување на професионална надоградба за возрасните, „Фенер“, ја најавува работилницата за дизајн во куклениот театар со Грета Клоу од Исланд. Куклите создадени од учесниците во работилницата ќе бидат изложени во фоајето на МОБ во текот на последниот фестивалски ден. Дизајнерското дуо АЛМА (Маја Ѓуреска и Александра Јовановска) во вид на изложба ќе ја претстави најновата колекција за деца, инспирирана од природата, која во рамките на Фестивалот ќе биде подарена на децата од Домот за деца без родители.
Овогодишното издание на фестивалот се реализира во состав на проектот „Децата во Центар (на вниманието)“, преку кој „Буден Театар“ во изминатите пет месеци реализираше серија културни активности за децата на територијата на Општина Центар. Овој проект е поддржан од ЕУ во состав на проектот „Граѓанско учество за локална демократија” на ФОСМ. Претставата „Писмо некому”, креативната работилница „ИнспириГра“ и читачкото катче „Итам да читам“, се дел од активностите кои беа реализирани во рамките на овој проект, и кои ќе бидат прикажани и на „Фенер“.
