Во пожарот кој избувна утринава на депонија во реонот на Визбегово, општина Шуто Оризари, според информациите на МИА од терен, интервенираат еден Ер трактор на Дирекцијата за заштита и спасување (ДЗС), еден хеликоптер на Министерството за внатрешни работи, еден хермелин и повеќе возила на Бригатата за противпожарна заштита (БППЗ) на Град Скопје, како и возила од ЈП Комунална хигиена.
Едно лице е повредено во пожарот што денеска избувна на дивата депонија во Визбегово. Во пожарот се зафатени хаварисани возила со плински боци поради што се слушаат детонации. Нема зафатено куќи.
Министерството за внатрешни работи потврди дека едно лице е повредено и пренесено за укажување лекарска помош.
– Денеска (09.07.2025) во 09.16 ч. во СВР Скопје е пријавено дека на отпад за старо железо ул. „Б. Буна“ во Скопје има пожар односно дека горат хаварисани возила, на кои имало монтирано плински уреди и се слушаат детонации од истите. До сега нема зафатено приватен имот – куќи. Се преземаат мерки за гасење на огнот и расчистување на случајот. До овој момент едно лице е повредено и е пренесено за укажување лекарска помош, стои во информацијата од МВР.
Министерството за внатрешни работи потврди дека е приведен сопственикот на отпадот во Визбегово каде во тек е акција на гаснење на пожарот. Во пожарот е повредено и едно лице.
– До овој момент едно лице е повредено и е пренесено за укажување лекарска помош. Поради непочитување наредба од службено лице, приведен е А.Н., сопственик на правното лице што управува со отпадот, информира МВР.
Според она што можеше да се види на терен, пожарот од силниот ветер сѐ повеќе се разгорува и претставува ризик да се прошири кон куќите што се наоѓаат во непосредна близина.
Пред да биде интервенирано од страна на ДЗС и МВР, локалното население со помош на камиони и багери го расчистуваа околниот отпад од старо железо и гуми кој сѐ уште не беше зафатен од пожарот, по што полицијата целосно го забрани пристапот до местото.
Од Центарот за управување со кризи (ДЗС) соопштуваат дека пожарот претставува опасност за жителите во Шуто Оризари и доколку има потреба тие ќе бидат евакуирани. Додаваат дека бил запознаен градоначалникот на Шуто Оризари Курто Дудуш, којшто, како што велат, ќе процени дали има потреба за евакуација на населението во реонот.
– Во реонот на Визбегово, општина Шуто Оризари во близина на дивата депонија, избувнал пожар кој се шири и претставува ризик за проширување кон околните површини. Има опасност бидејќи во близина се наоѓаат станбени куќи. По барање на градоначалникот на Општина Шуто Оризари, Курто Дудуш, побарана е воздушна поддршка за справување со пожарот. Центарот за управување со кризи (ЦУК) веднаш го процесуираше барањето до Министерството за внатрешни работи (МВР) и Дирекцијата за заштита и спасување (ДЗС), со цел побрза и поефикасна интервенција на терен, соопштуваат од ЦУК.
Апелираат до граѓаните да се воздржат од движење во близина на критичната зона и да останат дома со затворени прозорци, сè додека не се стабилизира состојбата.
Командантот на Територијалната противпожарна единица на Град Скопје, Звонко Томески, во првичната изјава дадена за МИА утринава, информираше дека интервенираат со четири возила.
Фото и видео: МВР
