Министерството за внатрешни работи соопшти дека денеска, полициски службеници од Галате го лишиле од слобода е Л.А. (32) од Р.Албанија, за основано сомнение дека подметнал пожар над гостиварско Пожаране. Едно лице е осомничено и за пожарот во Старо Нагоричане, а две лица се сомничат за предизвикување пожар кај катлановско Блаце.
Според МВР, Л.А. (32) од Р.Албанија, кој илегално престојувал во државата, е лишен од слобода поради постоење основи на сомнение дека подметнал пожар над гостиварско Пожаране. и тој ќе биде задржан за понатамошна постапка.
Едно лице е осомничено и за пожарот во Старо Нагоричане и полициските службеници веќе постапуваат во координација со Јавен обвинител. Вчера, пак, благодарение на брзата интервенција на полициска патрола и на екипа на Бригадата за противпожарна заштита Скопје, спречен е пожар од поголем размер пред село Блаце кон Катланово, за кој две лица се под сомнение за негово предизвикување и се работи на расчистување и на овој случај.
МВР апелира строго да се почитува забраната за движење во шумските предели, граѓаните максимално да се воздржат од палење огнови, отпадоци, меѓи и стрништа на нивите, да не фрлаат неизгаснати догорчиња и да не оставаат стаклени шишиња или други предмети, кои подолго време изложени на сонце, можат да предизвикаат пожар.
„Неопходна е максимална будност и целосно одговорно однесување на секој поединец. Потсетуваме дека предизвикувањето на пожар намерно или од невнимание претставува кривично дело, кое се санкционира со соодветни поднесоци и за кое е предвидена и затворска казна до 8 години (член 227 од Кривичниот законик), зависно од видот на пожарот и другите околности и последици“, се вели во соопштението на МВР.