Редакцијата при медиумската платформа на ЦИВИЛ утринава упати официјален допис до Агенцијата за разузнавање (АР) со барање за став по три клучни прашања поврзани со актуелната безбедносна афера: наводите за присуство на нивни високи припадници при првичните интервенции во Кабинетот, оперативните сознанија за потенцијална вклученост на руската разузнавачка служба (СВР) и координацијата со НАТО сојузниците за проценка на штетата.
Во одговорот што пристигна до нашата редакција веднаш по испраќањето на прашањата, Агенцијата за разузнавање децидно ја отфрла инволвираноста на своите припадници во случајот. Одговорот го пренесуваме интегрално:
„Почитувани,
Во врска со Вашите прашања, ставот на Агенција за разузнавање е следниот:
Агенција за разузнавање отфрла каква и да било инволвираност на свои припадници во веста што првично беше објавена на 19.05.2026 г., во некои медиуми и социјални мрежи за евентуално компромитирање класифицирани информаци и НАТО комуникации.
Во своето работење, Агенцијата, доследно ги применува сите законски стандарди и протоколи за соодветно ракување и заштита на nationalните и НАТО класифицираните информации.
Со почит,
АР“
Од содржината на кусиот допис на Агенцијата за разузнавање е видливо дека институцијата се фокусира исклучиво на отфрлање на наводите за вмешаност на нејзини припадници во настаните во Кабинетот.
Во официјалниот одговор на АР нема конкретен коментар за преостанатите две прашања упатени од ЦИВИЛ, кои се однесуваа на оперативните сознанија на Агенцијата за руската врска во дигиталниот упад, како и за евентуалните вонредни мерки што се преземаат во координација со НАТО алијансата за заштита на компромитираните сојузнички податоци.
ЦИВИЛ продолжува да го следи развојот на настаните и во текот на денот ги очекува одговорите на истите прашања кои беа уредно испратени и до Кабинетот на Премиерот и до Основното јавно обвинителство.
Џабир Дерала
Поддршка за ЦИВИЛ
