Резултатите од изборите во Европската унија со голема победа на десницата но и на екстремната левица беа очекувани, изјави за ЦИВИЛ Медиа универзитетскиот професор Мурат Алиу. Тој вели дека растот на екстремната десница е загрижувачки за самата Европска унија, но не на алармантно ниво со какви било последици за самата Унија.
„Сите анкети зборуваа за зголемување на екстремната десница, но не само екстремната десница туку и екстремната левица. Помалку или повеќе, тие имаат свои сличности, особено во однос на Европа, консолидацијата на Европската Унија и во овој контекст има прилично голем раст, да речеме, на двете крајности. Ова за поборниците и поддржувачите на Европската унија или за оние кои сакаат силна ЕУ е пораз, но не толку загрижувачки бидејќи социјалдемократските партии и партиите десно од центарот и либералите успеаја да го задржат мнозинството во Европскиот Парламентот и сите овие партии се про-Европската Унија“, рече професорот Алиу.
Што се однесува до земјите кои претендираат да станат членки на Унијата, за професорот по политички науки, Мурат Алиу, овој резултат значи благо зголемување на потешкотиите на евроинтеграцискиот процес, но оптимист е за умереноста на екстремната десница и омекнувањето на тоновите по нивното доаѓање на власт.
„Мислам дека ЕУ, и земјите кои се веќе членки на ЕУ, но и земјите кои се стремат кон ЕУ, ќе се соочат со поголем отпор во Парламентот, имајќи предвид дека екстремната десница и екстремната левица ги зголемија своите бројки во Парламентот, што значи дека ќе има отпор по ова прашање, дискурс или поостар јазик, или политики повеќе против Европската Унија. Ова ќе ја отежне интеграцијата на земјите аспиранти во ЕУ, особено од Западен Балкан, но сакам да останам оптимист“, рече Алиу.
Полесен пат за Албанија поради блискоста Рама-Мелони
Првиот човек на Евроатлантскиот совет и познавач на состојбите, Исмет Рамадани за ЦИВИЛ Медиа вели Албанија има полесен пат поради тоа што има добри односи со Италија. Што се однесува до Косово, тој вели дека не треба да се назначуваат олеснувачи од земји кои не го признаваат Косово како држава.
„Што се однесува до Албанија, таа нема да има проблеми во нејзиниот пат кон Европската унија особено поради зајакнувањето на Ѓорѓа Мелони во Италија и односите кои сега се речиси лични меѓу албанскиот премиер Еди Рама и италијанската премиерка. Иако Еди Рама припаѓа на левицата, тој знаел и знае како да одржува односи дури и со конзервативната десница, а сето тоа нема да биде проблем за Албанија. Меѓутоа, Албанија има проблем со Грција во врска со овој случај на Фреди Белери, но сепак мислам дека Рама има способност и потенцијал да најде решение и да тргне кон интеграцијата“, вели Рамадани.
Во однос на Косово, може да се очекуваат одредени „услуги“ во однос на оние кои ќе посредуваат во разговорите со Србија истакнува Рамадани.
„Свесни сме дека двајцата европски претставници Борел како министер за надворешни работи кој го назначи Лајчак, од сите разговори меѓу Косово и Србија резултатите не се воопшто задоволителни или нема напредок. Напротив, наместо да се нормализираат односите Косово-Србија, тие се влошија. Мора да се назначи европски претставник кој нема да биде од земјите кои се уште не го прифатиле Косово како држава. Тоа треба да биде олеснувач кој сепак има влијание, се разбира дека САД овде помагаат овде како и секогаш“.
Гаранциите што ги бара ВМРО-ДПМНЕ од ЕУ со победата на десничарите, ќе бидат декларативни, но не и на хартија
За тоа колку победата на европските десничарски партии ќе влијае на евроинтеграцискиот пат на Северна Македонија, Исмет Рамадани вчера за ЦИВИЛ Медиа истакна дека ќе има континуиран притисок и барања земјата да ги исполни обврските што произлегуваат од францускиот предлог, а тоа се уставните измени. Дури, како што вели Рамадани, сега тоа ќе го прават со поголем и директен кредибилитет бидејќи ВМРО-ДПМНЕ припаѓа на групацијата на европските конзервативни народни партии ЕПП.
„ВМРО – ДПМНЕ, како конзервативна десничарска партија, не може да го избегне ова барање и да бара алиби во другите опции, бидејќи во крајна линија, за да останат како членка и во дискурс со овие конзервативни партии или ЕПП, мора и да го пренесат нивниот начин и барања и мислам дека тоа ќе влијае да се забрза да се најде некое споредно алиби, како што велат од ВМРО-ДПМНЕ било каква гаранција и таа гаранција ќе биде декларативна и нема да биде во никакво посебно писмо или со нешто што може да ја промени рамката на преговори со Европската Унија. Исто така, оваа групација на конзервативни партии треба да внимава ВМРО-ДПМНЕ да не се придвижи кон екстремната десница“, рече меѓу другото Рамадани.
Назми Абдурахмани
