Австрискиот европратеник Хелмут Брандштетер побара од Европската комисија да ги суспендира пристапните преговори со Србија и да ги запре сите исплати кон земјата, сè додека српските власти недвосмислено не се оградат од величањето на осудени воени злосторници.
Брандштетер, европратеник од австриската либерална партија NEOS и известувач во сенка за Србија од либералната група „Обнова на Европа“ во Европскиот парламент, реагираше по јавните почести што претставници на српските власти му ги оддадоа на Ратко Младиќ по неговата смрт.
„Ратко Младиќ беше осуден за геноцид и злосторства против човештвото. Кога претставници на власта на земја кандидат за членство во ЕУ по неговата смрт величаат таков човек, премината е црвената линија“, порача Брандштетер.
Според него, таквото однесување претставува исмевање на жртвите и нивните семејства и е во фундаментална спротивност со вредностите на Европската Унија.
Брандштетер побара Европската комисија да ги суспендира пристапните преговори и да ги запре сите исплати кон Србија сè додека властите во Белград јасно и недвосмислено не го отфрлат величањето на осудени воени злосторници. Тој побара во меѓувреме да не се преземаат ниту натамошни чекори поврзани со интеграцијата на Србија во Шенген-зоната.
Истовремено, европратеникот нагласи дека неговото барање не претставува отфрлање на европската перспектива на Србија.
„Србија ѝ припаѓа на Европа и треба да стане дел од ЕУ. Но, тоа подразбира безусловно почитување на човековите права“, порача Брандштетер.
Барањето на австрискиот европратеник доаѓа во време на сè погласни реакции во Европа поради величањето на Младиќ, кој издржуваше доживотна затворска казна по правосилната пресуда за геноцид, злосторства против човештвото и воени злосторства.
ЦИВИЛ уште на 30 август побара конкретни мерки од ЕУ
Неколку дена пред реакцијата на Брандштетер, ЦИВИЛ – Центар за слобода, во опширното соопштение објавено на 30 август 2026 година на македонски, албански и англиски јазик, побара европските институции да преминат од декларативни осуди кон конкретни политички и финансиски мерки против владите, институциите, политичките структури и функционерите кои промовираат или толерираат негирање на геноцидот и величање на осудени воени злосторници.
Меѓу другото, ЦИВИЛ побара финансиската и политичката поддршка да биде условена со почитување на меѓународното право и правосилните судски пресуди, како и да се разгледа суспендирање или пренасочување на финансиската помош кога владите, институциите или политичките структури толерираат или промовираат вакви појави.
ЦИВИЛ на 2 септември повторно го издвои и објави овој дел од соопштението, со повик Европската Унија конкретно да санкционира глорификација на воени злосторници и негирање на геноцид.
Барањето на Брандштетер е независна политичка реакција и нема основа да се воспоставува причинско-последична врска со повикот на ЦИВИЛ. Сепак, хронологијата покажува дека барањето за конкретни европски политички и финансиски мерки, кое ЦИВИЛ јавно го упати на 30 август, сега се појавува и на ниво на Европскиот парламент.
ЦМ Деск
Неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
