Европските лидери подготвуваат план за мировни сили во Украина со американски трупи како „безбедносна мрежа“, додека францускиот претседател Емануел Макрон и британскиот премиер Кир Стармер се подготвуваат да го посетат американскиот претседател Доналд Трамп во Вашингтон следната недела.
Велика Британија и Франција развиваат план за распоредување на околу 30.000 европски мировници во Украина доколку Москва и Кијив постигнат договор за прекин на огнот, соопштија европски претставници, пишува „Волстрит Џурнал“.
Сепак, европскиот план зависи од тоа дали американскиот претседател Доналд Трамп ќе се согласи на ограничена улога на американски војници која британските власти ја нарекуваат „безбедносна мрежа“.
Американските сили треба да обезбедат заштита за европските војници во Украина доколку се најдат во опасност и би ја одвраќале Русија од какво било прекршувања на примирјето, изјавиле неименувани европски претставници запознаени со ова прашање.
Елисејската палата и Белата куќа вчера потврдија дека францускиот претседател Емануел Макрон ќе се сретне со американскиот претседател Трамп утре во Вашингтон, а британскиот премиер Кир Стармер ќе биде во Вашингтон в четврток, пренесе МИА.
