„Неформална“ група провладини медиуми вчера побрзаа да објават дека на протестот на иницијативата “Кој е следен” за 59-те жртви од пожарот во кочанската дискотека „Пулс“ имало далеку помала масовност од најавуваната (+инфо); само неколку стотини луѓе се појавија (Лидер); народот ги свати (со В наместо сфати, можеби од брзање, а не поради недоволна писменост н.з.) обидите за злоупотреба на трагедијата, околу 300 луѓе на вечерашниот протест на плоштад (Курир); само стотици граѓани излегоа на марш, препознаени политичките игри за злоупотреба на несреќата (Република).
Во веќе познатите манири на владините медиуми, објавите беа проследени со фотографии направени пред почетокот на маршот, кога сé уште граѓаните се собираа на плоштад, за да се долови „лагата“ дека имало само стотина, со етикетирање и дисквалификација на учесниците (осудениот за палењето на канцеларијата на претседателот Иванов, Борјан Ефтимов), произволните пребројувања (Според независни извори!?, на протестот во понеделникот вечер учествувале околу 3.000 граѓани, додека опозициските медиуми се пофалија дека биле над 10.000), користејќи паралели со веќе демантирани видеа, и со други собири кои не се во корелација со маршот во организација на „Кој е следен?“
Ден потоа, откако беа демантирани од видеата споделувани на независни медиуми и социјалните мрежи на кои се гледа учество на илјадници граѓанки и граѓани. Слеани во река од народ како се движат по маршутата од плоштад кон Влада, дел од нив се обидоа да ги сокријат објавените дезинформации, бришејќи го објавите, но трагот остана.
Дел од нив пробаа, како што самите признаваат, по бројните критики дека ја промашиле бројката на демонстранти на вечерашниот протест во Скопје, патетично, во 1:54 по полноќ, да се оправдаат со младиот пленумец со мегафон кој кажа дека студентите не сакаат новинари, а тие му удоволиле и не испратиле новинарска екипа на протестниот марш, па така бројката на демонстранти морале да ја одредат произволно и така некако им личело дека има неколку стотини???
Момчето со мегафонот беше на пленумот организиран на платото во УКИМ во 13 часот на пладне, додека протестниот марш беше на Плоштадот Македонија, во центарот на Скопје со почеток во 18:59 часот. Различно време, различна локација, различни организатори!
Ова се некои нови генерации, и ваквите наивни лаги тешко проаѓаат.
Драган Мишев
