Коалицијата „Сексуални и здравствени права на маргинализираните заедници“ во партнерство со „ЛГБТИ – Центарот за поддршка“ и „ЛГБТ Јунајтед“ од Тетово, ги повикуваат граѓанките и граѓаните да се пријават на курсот за фотографија за зголемување на видливоста на сексуалните и родовите малцинства.
Курсот ќе се одржува во текот на викендите (во сабота и недела), во периодот од 20 април до 20 мај во Скопје. Предавањата и работилниците на курсот ќе ги водат Драшко Костовски, Жарко Чулиќ, Томислав Георгиев, и Славчо Димитров. Под менторство на предавачите, во текот на курсот, секој учесник ќе работи на развивање на авторски и иднивидуален фотографски проект.
Фотографиите снимени за време на курсот ќе бидат изложени во рамките на фестивалската програма на овогодишниот „Викенд на гордоста Скопje 2017“.
Организирањето на курсот има за цел да ја зголеми видливоста на сексуалните и родовите малцински групи и индивидуи и да ја намали нивната дискриминацијата и стереотипното претставување во втемелената култура и медиуми.
Курсот ќе им овозможи на лезбејките, геј мажите, бисексуалните, трансродовите, интерсексуалните и квир лицата да стекнат познавање, вештини и капацитети за себе-претставување и изразување на сопствените искуства, култура и практики, како и за подигање на свеста за негативните стереотипи и за искуствата на насилно однесување, кои не се вклучени во доминатните медиумски визуелни содржини и културни политики.
Посебен акцент во текот на курсот ќе биде ставен на користењето на фотографијата како средство за граѓански активизам и социјална критика. Предност во селекцијата на учесниците во курсот ќе имаат лицата од ЛГБТИ заедницата, но повикот е отворен и за сите лица кои се идентификуваат во квир спектарот, или пак лица кои едноставно имаат интерес и желба за покривање на квир теми.
Курсот за фотографија е дел од „Проект на УСАИД за подобрување на статусот на ЛГБТИ луѓето во Република Македонија“.