На Фејсбук страницата Лудата Јоци фан клуб е објавена фотошопирана фотографија на која министерката за одбрана Радмила Шекеринска наводно е со градоначалникот на Кичево, Фатмир Дехари и уште неколку лица кои држат албанско знаме, а на ѕидот е закачена фотографија од УЧК. Лажната фотографијата е проследена со коментар: „Прв земјотрес од кога сме членка на НАТО – Шеќеринска Северџан“.
Ваквата објава предизвика низа на коментари со говор на омраза. Еден од коментарите е на Ристо Николов кој пишува: „на кокошката треба да и се скине главата“.
Кире Стојаноски пишува: Срам да ви е, култура на ниво, не си го сакате сопствениот народ па ќе ве сакаат Бугарите. Админот на страницата одговара дека не гледа луѓе и народ на сликава и дека не го интересира дали ќе нè сакаат Бугарите.
Објавата со фотошопираната фотографија ја сподели и Фејсбук страницата Секула Војвода фан клуб каде има неколку коментари на граган(к)и кои подпаднале на лажната фотографија.
Фотошопираната фотографијата е (зло)употребена за политички цели и за да се манипулира со јавноста. ЦИВИЛ веќе долго време ги следи овие појави и секојдневно објавува извештаи во кои ваквите содржини ги разобличува, а во својата комуникација со јавноста, ги повикува граѓанките и граѓаните да се спротивстават на ваквото штетно дејствување со пријавување и преиспитување на секоја содржина во медиумите и социјалните мрежи. Исто така, ЦИВИЛ континуирано ги повикува институциите да ги спречат и санкционираат центрите во кои се продуцираат и од кои се дистрибуираат овие содржини.
Дехран Муратов