Француската морнарица се качила на танкер за нафта кој бил под меѓународни санкции и пловел од Русија, соопшти францускиот претседател Emmanuel Macron, пренесува Гардијан.
Според Макрон, операцијата била спроведена во Атлантскиот Океан, на отворено море, со поддршка од повеќе партнери, меѓу кои и Велика Британија, во согласност со меѓународното поморско право. Тој наведе дека танкерот, именуван „Тагор“ (Tagor), бил дел од пошироките активности насочени кон спречување на заобиколување на санкциите воведени против Русија поради војната во Украина.
La Marine nationale a arraisonné hier matin un nouveau pétrolier sous sanctions internationales en provenance de Russie : le Tagor. Notre détermination est constante et totale.
Cette intervention a été effectuée en Atlantique, en haute mer,… pic.twitter.com/zxEslYjbUE
— Emmanuel Macron (@EmmanuelMacron) June 1, 2026
„Неприфатливо е бродови да ги заобиколуваат меѓународните санкции, да го кршат морското право и да ја финансираат војната што Русија ја води против Украина повеќе од четири години“, напиша Макрон на социјалната мрежа Икс.
Поморската префектура на Атлантикот соопшти дека француската морнарица интервенирала на танкер кој се наоѓал повеќе од 740 километри западно од Бретања и пристигнувал од Мурманск, Русија. Според властите, постоеле сомневања дека бродот пловел под лажно знаме. По проверката на документацијата, инспекторите утврдиле неправилности, по што танкерот бил пренасочен по налог на обвинителството и во согласност со меѓународното право.
Франција и Велика Британија во последните месеци ги засилија мерките против таканаречената „сенка флота“ на Русија – мрежа од танкери кои се користат за транспорт на руска нафта надвор од санкциските режими. И покрај засилените контроли, податоците за поморскиот сообраќај покажуваат дека десетици санкционирани или сомнителни бродови и понатаму минуваат низ европските води.
извор: Гардијан
