Здружението на новинарите на Македонија својот јубилеј „72 години од основањето“ го одбележа со доделување на новинарски награди и тоа годишната истражувачка награда и наградата за животно дело.
„Она што мене ми даде новинарството беше да го видам светот, да научам многу, да се запознам со најелитните луѓе во светот, од кои научив како се учи и истражува. Уште позначајно е што оваа награда ја добиваат оние што преживеале. Во Титова Југославија новинарите живееја во просек помалку од 55 години. Денеска живеат и повеќе, ама ги бркаат по сокаци. Знам дека кој и да решил да дојде во МРТВ, решава и да ме брка од работа. И СКМ и СДСМ и ВМРО-ДПМНЕ… Она што е најважно, новинарот треба да го чува образот, да биде морален, да знае да постави прашање…“, изјави Љубомир Гајдов, добитникот на наградата за животоно дело.
Наградата за истражувачко новинарство ја поделија Менче Точи и Снежана Лупевска – Созен.
Менче Точи ја доби наградата за сторијата „Гинеколог девет месеци лажел пациентка дека е бремена“, Снежана Лупеска -Созен, во рамки на емисијата „Код“ за серијата стории поврзани со настаните од 27 април во Собранието.
Претседателот на ЗНМ, Насер Селмани, во своето обраќање израази надеж дека новата власт нема да ја негува практиката на неказнивост на насилството врз новинари. Тој потсети дека сè уште ниту еден напаѓач на новинари не е излезен пред лицето на правдата. Исто така, ја искажа и својата загриженост од реформите во медиумите, а новинарите се соочуваат со нови форми на притисоци.
Биљана Јордановска
