Претседателот на Собранието на Северна Македонија, Африм Гаши, по три дена извртување на неговото име затоа што рекол дека „Косово му е татковина“, излезе со реакција, нагласувајќи дека негова татковина е Северна Македонија и ова е последен пат да се изјасни за оваа тема.
„Во однос на прашањето за мојата татковина, свесен сум за обвинувањата и искривувањата од различни медиуми кои се обидуваат да привлечат внимание. Како претседател на Собранието на сите граѓани на Република Северна Македонија, сакам да појаснам дека Африм Гаши е роден во Скопје, каде живее и работи со своето семејство, а негова татковина е Северна Македонија“, пишува Гаши на Фејсбук статус.
Лексиколошки грешки
Гаши понатаму пишува дека во јазикот на кој ја дал изјавата, на албански, има сложени именки, а кога се преведува на македонски јазик излегува од контекст.
„Да појаснам и за јавноста, точната изјава во моето интервју беше дека „Косово е родно место или татковина на моите родители и јас го почитувам како такво заради нив“. Сепак, верувам дека се разбираме доволно добро за да не бараме детални објаснувања за поимите како родно место, татковина или мајковина, бидејќи албанскиот јазик користи и сложена именка што комбинира мајка и земја“.
Гаши: Ова е последна изјава за ова тема
Претседателот на Собранието Африм Гаши вели дека од тврдењата и изјавите за патриотизам граѓаните немаат никаква корист, а ние не сме тука да се натпреваруваме кој е по патриот.
„За мене најважно е преку нашите постапки да покажеме како ја гледаме нашата земја, која е нашата посветеност кон неа, кои се нашите придонеси и да правиме разлика меѓу оние кои ја градат и збогатуваат и оние кои ја уништуваат и крадат таа. Од тврдењата и изјавите за патриотизам граѓаните немаат никаква корист, а ние не сме тука да се натпреваруваме кој е по патриот. Јас не уживам во такви дебати и ова е мојата конечна изјава за оваа тема“, истакна Гаши.
Мицкоски вчера по доделувањето на мандатот од страна на претседателката Гордана Сиљановска Давкова, рече дека не ја слушнал изјавата на Гаши, но дека тој треба да се извини доколку навистина изјавил дека Косово е неговата татковина.
„Мислам дека неговата татковина е Македонија. И од тоа што сум го разговарал со него, сум слушнал лично од него дека наша заедничка татковина е нашата заедничка Македонија. Ако има таква изјава, тогаш мислам дека треба да им се извини на граѓаните на Македонија и тоа треба час поскоро да го направи, бидејќи од тука тој зема плата и од страна на Македонците, Турците, Албанците, Власите е избран за претседател на македонското Собрание“, рече Мицкоски.
Дерала: За што да се извини Гаши
Главниот уредник на ЦИВИЛ Медиа Џабир Дерала во колумна објавена денеска ја иронизира сета хистерија од изјавата на претседателот на Собранието, Африм Гаши, опишувајќи го целиот настан како „скандалозно!
„Скандалозно! Претседателот на Собранието, Африм Гаши рекол дека негова татковина е Косово! Па како може така!? Од каде зема плата, каде дошол на власт, пред кого одговара, каде лежи неговата лојалност, преседан, нека си оди во Косово… се слушаат пискотници од сите ќошиња на медиумската џунгла“, пишува Дерала.
Се разбира, Мицкоски мандатарот, веднаш се истакна или барем медиумите, речиси без исклучок, му го дадоа вообичаеното најистакнато место. Тој побара од Гаши да се извини, „ако така рекол“. Точно така, Мицкоски од Гаши побара да се извини, ако рекол дека негова татковина е Косово.
Дерала по натаму прашува за што да се извини Гаши? За потеклото? Дека е загрижен што се случува со државата од која потекнуваат неговите родители, а патем е наша соседна држава? Или треба да се извини што до 1991 година немало граница меѓу двете држави, тогаш федерални единици на една поголема држава?
Н. Абдурахмани
