Кандидатот за канцелар на левоцентристичките социјалдемократи на денешните парламентарни избори во Германија, Олаф Шолц ги поздрави резултатите на неговата партија како „голем успех“, откако првичните прогнози покажаа дека неговата СПД има мало водство пред конзервативците.
– Ова ќе биде долга изборна ноќ, тоа е сигурно. Но, исто така, е сигурно дека многу граѓани ја избраа СПД бидејќи сакаат промена на власта, и сакаат следниот канцелар да се вика Олаф Шолц, истакна тој пред своите поддржувачи.
Кандидатот на ЦДУ/ЦСУ за иден германски канцелар, Армин Лашет вечерва изјави дека се води тесна борба во изборната ноќ, но порача дека унионистите сакаат да ја водат новата влада.
На почетокот на своето обраќање во изборниот штаб, тој нагласи дека првпат по 16 години Ангела Меркел не се кандидирала за канцелар, па затоа тие влегле во изборната трка без „бонус“.
– Знаевме дека ќе биде тешко и дека ќе имаме тесна борба во изборната ноќ. Се уште немаме конечни резултати. Но, треба да кажеме дека не можеме да бидеме задоволни со резултатот, констатира Лашет.
Тој истакна дека во секој случај, исходот од гласањето ја става Германија, но и ЦДУ/ЦСУ, како и сите демократски партии, пред голем предизвик, бидејќи е неопходно да се постават насоки за наредните години.
– Тоа не може да го направи само една партија, треба да ги надминеме сите поделби и да соработуваме. Првпат ќе имаме тројна влада, нагласи Лашет.
Тој рече дека ЦДУ/ЦСУ добила глас од своите избирачи, владата да биде преведена од таа партија.
– Затоа ќе сториме се за да формираме влада предводена од ЦДУ/ЦСУ, бидејќи на Германија и е потребна коалиција на иднината, која ќе ја модернизира земјата, нагласи Лашет.
Ако изборите во Германија се неизвесни, тогаш формирањето на владина коалиција ќе биде уште помалку извесно. Трета политичка сила на овие избори, според прелиминарните резултати се Зелените, со својата кандидатка Аналена Баербок, потоа Слободните демократи, кои се во мала предност пред ултра-десничарите Алтернатива за Германија. На крајот од листата, со само околу 5% освоени места (за сега) во Бундестагот, се наоѓа германската Левица.
Д. М.