Хелсиншкиот комитет за човекови права организира конференција „Очи за еднаквост“ посветена на лицата со посебни потреби, која ќе се одржи на 15 ноември (среда), во 11 часот, во хотелот „Арка“ во Скопје.
„Преку конференцијата сакаме да ја информираме јавноста и граѓаните подетално за наодите од истражувањата и анализите за потребите за промени на лицата со посебни потреби во областите: социјална заштита, образование, здравствена заштита, вработување и квалитет на живот“, стои во поканата за настанот.
Воведно обраќање на прес-конференцијата ќе има британскиот амбасадор во Македонија, Чарлс Герет и извршната директорка на Хелсиншкиот комитет за човекови права, Уранија Пировска, а потоа, ќе следи обраќање и на министрите и претставници на министерствата надлежни за областите во кои беа спроведени истражувањата.
Конференцијата е во рамки на проектот „Поддршка од граѓанското општество кон политиките за социјална кохезија и различностите“ поддржан од британската амбасада во Македонија.
Одбележувањето на Меѓународниот ден на толеранцијата 15 Ноември, ќе продолжи со Маршот на толеранција, со почеток во 15 часот, пред Музејот на град Скопје.
Оваа година, како и конферецијата, и маршот е посветен за кревање на свесноста за потребата за активно вклучување на лицата со попреченост во општествениот, јавниот и политички живот.
„Имајќи предвид дека една од главните пречки за непречено движење на лицата со физичка попреченост, особено оние кои се наоѓаат во инвалидски колички и слепите лица, е неприлагодениот урбанистички простор, би сакале на овој Марш да ја покренеме свесноста преку акција за обележување на непристапните места и тротоари долж рутата, кои обележувања би послужиле како насоки за натамошни корекции од градските власти“, стои во повикот на Хелсиншкиот комитет.
ЦИВИЛ – Центар за слобода и оваа година е дел од организациите што го поддржуваат настанот.
Од ЦИВИЛ апелираат за толеранција меѓу граѓанките и граѓаните за почитување на различностите и за солидарност како одговор на неодговорноста и негрижата на државата и на надлежните институции за лицата со попреченост. ЦИВИЛ повикува на нулта толеранција кон дискриминацијата и кршењето на човековите права и слободи и ги повикува надлежните институции и граѓанските организации да не се откажат од борбата за фундаментални човекови права и слободи за лицата со попреченост.
М. И.
