Во рамки на годинашната јубилејна 15-та манифестација „Бела ноќ“ што се одржа во саботата, публиката имаше можност на 15 различни локации да проследи изложби, театарски перформанси, претстави, концерти и концертни настапи.
На еден од централните настани, пред Универзалната сала, музичките легенди Славе Димитров, Верица Ристевска, Драган Мијалковски, Лидија Кочовска, заедно со Сашо Гигов – Гиш, Ѓоко Танески, Ај Кју и Сара Мејс изведуваа мелодии од „Скопски Фестивал“. Фестивалот не се одржува веќе четврта година, а дотраениот објект на Универзалната сала веќе трета година не е во функција.
Како што соопшти Универзална сала – Скопје, на крајот на концертот, по заедничката изведба на легендарната „Чија си“ со Славе Димитров, пејачите заедно со присутните апелираа за враќање на „Скопскиот фестивал“ и обновување на еден од симболите на Скопје, Универзалната сала.
Gepostet von Бела Ноќ am Montag, 7. Oktober 2019
Годинашните победници на 3Д мапинг натпреварот на фестивалот на светлината „Skopje Light Art District“, Џереми Ури и Милош Лисински, ја отсликуваа својата визуелна уметност на фасадата на катната гаража „26-ти јули“. Во МКЦ, во рамки на „НЕкултура“ фестивалот, со домашна поддршка, настапи британското електронско дуо Paranoid London.
Националната Опера и Балет со поставките на „Кармен“ и „Валпургиска ноќ“ одбележа 70 години постоење, а во МНТ се одигра претставата „Круг“ во режија на Наташа Поплавска, со Дејана Поповска и Јакопо Гарфањоли во главните улоги. Во Музејот на современата уметност свој заеднички настап имаа пијанистката Ема Попивода и диџејот Андреј Мицајков.
извор МИА
