Пожар избувна во најголемото складиште за нафта во Феодосија окупирана од Русија во раните утрински часови на 7 октомври по украинскиот напад, јавуваат руските медиуми и војската на Украина.
Украинските ракетни сили го нападнаа најголемото складиште за нафта во окупираниот Крим, што резултираше со пожар од големи размери, потврди Генералштабот на украинските вооружени сили, пренесува Кијив Индипендент.
Според Украинска правда, жителите пријавиле дека слушнале неколку силни експлозии околу 4:30 часот по локално време, непосредно пред да започне пожарот. Телеграм каналот Кримски ветер исто така објави дека аеродромите во Белбек и Саки биле нападнати во текот на ноќта.
Локалните власти го потврдија инцидентот, но го опишаа како пожар.
„Има пожар во складиштето за нафта Феодосија. Службите за итни случаи се на терен. Нема пријавени жртви или повредени“, рече на Телеграм Олег Крјучков, советник на полномошникот на Крим, инсталиран од Русија.
Телеграм каналот Астра подоцна појасни дека објектот во пламен бил Морскиот нафтен терминал, кој и претходно бил цел на беспилотни летала во март 2024 година. Во тоа време четири беспилотни летала удриле во складиштето, оштетувајќи го главниот цевковод за гориво и предизвикале пожар, за кој требало повеќе од еден час да се изгасне.
Терминалот Феодосија е најголемиот во Крим за ракување со нафтени деривати, а само уште еден терминал од ваков вид се наоѓа во Севастопол.
Објектот „особено се користеше за снабдување на руската окупациска армија“, истакна Генералштабот. Се утврдува целосниот обем на штетата.
Во последниве месеци, украинските сили започнаа серија напади со беспилотни летала со цел да ја оштетат руската нафтена индустрија, чиј профит ги поттикнува воените напори на Москва.
Укринформ го пренесува Телеграм каналот Кримски ветер кој наведува дека најмалку три резервоари горат на нафтениот терминал во Феодосија во привремено окупираниот Крим како резултат на нападот со украински беспилотни летала во текот на ноќта.
„Повеќе ноќни видеа од Феодосија. Јасно е видливо дека најмалку три тенкови горат“, се вели во објавата.
Подоцна, на каналот беше објавено утринско видео, каде што може да се видат столбови чад над Феодосија.
Дополнително, каналот додаде дека во нападот биле оштетени пет цистерни со гориво – две биле целосно уништени, а уште три гореле. Поради нападот, прекинато е движењето на возовите на делницата од Владиславивка до Феодосија. Патниците од еден воз морале да користат автобуси. Во нападот се повредени три лица кои се хоспитализирани.
Драган Мишев
