Катерина Матевска на 7 декември на својот фејсбук профил објавува дека е кандидирана за претседателка на Општинската организација на СДСМ во Кичево.
Покрај многубројните честитки и желби за успех, не изостануваат коментарите кои директно или суптилно упатуваат на нејзино повлекување од трката за оваа функција. А сиот тој говор придружен со навреди, клевети, вулгарности, па и закани, не доаѓа како што се очекува од сегашната опозиција, туку од внатрешните редови на партијата.
„Пријавив во полиција за навреди, омаловажување, говор на омраза на социјалните мрежи против мене. Најверојатно се работи за најмени луѓе по налог на некого од Кичево за да ме исфрлат од игра за претседател на општинската организација на СДСМ во Кичево. Ниту е платена функција, ниту е нешто посебно, освен за организациски развој на СДСМ на општинско ниво, ама ете внатрешното гнило крило на партијата, што соработуваше долги години со режимот на штета на партијата и на цела држава, вклучи машинерија за ширење на клевети, навреди, закани…“ – изјави Матевска за ЦИВИЛ Медиа.
Говорот на омраза, жестокиот и вулгарен напад на Матевска не го поштеди ни нејзиното семејство. „Целта е да ме згазат целосно, за да не профункционира ОО СДСМ во Кичево. Јас сум член на СДСМ, ама гнилоста што ја имаме во партијата, доведува да бидеме таргет на некои криминални групи“ – додава Матевска.
Оваа немила ситуација само говори за тоа во колку грда состојба е општеството. Без морал и без скрупули, се бранат интереси со сите средства. Ако ваква црна кампања се води во битка за претседател за општинска организација на партијата во Кичево, каква ли борба ќе се водеше доколку Матевска, на пример, се кандидираше за претседателка на државата?
Биљана Јордановска
