Стручната служба на Државната изборна комисија за прв пат од постоењето на ДИК организира Отворен едукативен ден за граѓаните, по повод Глобалниот ден на изборите кој се одбележува токму денеска, на 1 февруари.
„Денеска сите заинтересирани граѓани се добредојдени во просториите на Државната изборна комисија, седиштето и подрачните одделенија и канцеларии, каде можат да проследат едукативна презентација и да се информираат околу остварувањето на своето избирачко право со особен фокус на водењето на Избирачкиот список. Воедно граѓаните имаат можност и да постават прашања до вработените во Стручната служба на ДИК, а и да подигнат едукативни материјали“, изјави Љупка Гугучевска од ДИК.
Таа додаде дека едукативната презентација опфаќа повеќе аспекти, и тоа, разграничувањето помеѓу активно и пасивно избирачко право, начинот на формирање и надлежностите на изборните органи во Република Македонија, водењето и ажурирањето на Избирачкиот список, процедурата за заштита на избирачкото право и електронските апликации кои се достапни за граѓаните.
„Државната изборна комисија, како највисок изборен орган, може успешно да ги спроведува своите надлежности само преку соработка со сите заинтересирани чинители, а особено со граѓаните. Интенцијата е ваквите отворени денови за граѓаните да преминат во редовна пракса во ДИК. Токму затоа, присуството и активното учество на граѓаните е од непроценлива важност за работата на Државната изборна комисија. Во оваа прилика сакам да ги поттикнам сите граѓани за што помасовно учество на ваквите отворени денови, со што ќе допринесат за подигање на квалитетот на целиот изборен процес на повисоко ниво“, истакна Гугучевска.
Глобалниот ден на изборите секоја година се одбележува во првиот четврток во февруари. Тој се одбележува како резултат на заложбата која произлегла од Глобалната конференција за избори која се одржала од 15 до 17 септември 2005 година во Будимпешта, Унгарија.
На овој ден изборните комисии ширум светот организираат тркалезни маси, дебати, работилници, средби со граѓани и сл. со цел да ја истакнат посветеноста на заштита на правото на глас како едно од основните човекови слободи и права.
Пред точно 70 години, со Универзалната декларација на Обединетите нации, правото на глас е востановено како едно од основните човекови права. Тоа се остварува преку слободни и фер избори, како темел на секое демократско општество.
Биљана Јордановска
Обработка на текст и камера: Дехран Муратов
