Како 36-та точка на дневниот ред на седницата на Советот на Град Скопје вчера беше предвиден Предлог-план за подобрување на квалитетот на воздухот, кој содржи 51 „драстична и систематска мерка“ за намалување на степенот на загадувањето, но професорката Мирјана Најчевска веднаш реагираше дека ниеден план за активности, не може да се базира само врз забрани за граѓаните, туку, пред сé, врз забрани за правни лица, и со стимулации и поддршка на граѓаните.
Предлог – планот за подобрување на квалитетот на воздухот во Скопскиот регион предвидува дефинирање на области каде што ќе биде задолжително поврзувањето на новите објекти на мрежата со централно греење, односно, проширување на мрежата за парно греење, замена на старите системи за греење што користат цврсто гориво со модерни грејни тела на пелети – со помош на субвенции, како и забрана за горење несоодветни или отпадни материјали во грејните тела во домаќинствата и промоција на употребата на квалитетно огревно дрво за греење во домаќинствата.
Предвидена е и замена на огревното дрво со централно парно греење, гас или друг вид на гориво, на долг рок, но и користење нови извори на енергија (соларна, геотермална…), а на краток рок – намалување на емисиите со правилно користење на печките и горивата, чистење на оџаците и зголемена проверка на системите за греење на цврсти горива.
Во Предлог-планот се наведени и мерки во однос на другите извори на загадување: сообраќајот (проширување на зоните со забранет сообраќај на тешки товарни возила, синхронизирање на семафорите и замена на семафори со кружни текови), индустријата, и поквалитетно управување со отпадот, а се препорачува и спречување на појавата на прашина по улиците со нивно интензивно чистење преку употреба на посовремени машини и изготвување студија за формирање зони со ниски емисии (LEZ-Low emission zone) во центарот на Скопје.
Професорката Мирјана Најчевска реагираше дека ниеден Предлог-план не може да се базира само на забрани за граѓаните, туку, пред сé, на забрани за правни лица, а на стимулации и на поддршка за граѓаните.
Таа смета дека Предлог-планот има недостатоци, и наведе предлози за негово збогатување во смисла на поголема ефикасност.
„Забрана на возење на нестандардни возила без соодветна пумпа и постари возила (чиј увоз го дозволи популистичката власт), забрана на градење во централното градско подрачје над одредени размери. забрана на отворање каменоломи во близина на градовите и пресметка на нивното влијание. стимулација на чистите извори на енергија (парична и со други видови бенефиции), демонополизација на централното затоплување и можност за избор, бесплатен градски сообраќај или барем енормно намалување на цените на градскиот сообраќај, воведување на трамвајски линии (она што требаше да се направи пред 10 години, наместо спомениците и идолатријата), возобновување на шинобусите и поврзување на приградските населби и општините кои гравитираат кон Скопје со старите железнички пруги“, пишува Најчевска.
Според неа, граѓан(к)ите кои гласаа за изборот на Коце Трајановски за скопски градоначалник, гласале и за загадувањето и за ненаменското трошење на парите, а актуелните локални власти во престолнината, кои се задолжени и одговорни за тоа, сега сакаат да го префрлат товарот на чистењето на воздухот врз граѓаните.
