Градоначалникот на Општина Кочани, Николчо Илијев за ЦИВИЛ Медиа вели дека го осудува секое насилство и непочитување на законите и додава дека случајот со тепаното дете во кочанско „Трајаново трло“ е изолиран случај и верува дека надлежните органи ќе го расчистат час поскоро.
„Во тоа маало граѓаните постојано се жалат дека има кражби. Дури и нашите објекти во локалната самоуправа се мета на кражби и досега ептен мал број се расчистени. Поради тоа во Трајаново Трло самите жители се самоорганизираа да се штитат од провали и кражби. Јас остварив средба со дел од иницијативниот одбор и началникот на полиција во Кочани за да изнајдеме решение како да се стави крај на кражбите, како и да се спречи загадувањето на воздухот и да не се создаваат депонии“, вели тој.
Градоначалникот на Кочани вели дека веќе е одобрен проект за изградба на типски куќи за 28 семејства кои се социјално загрозени.
„На 8 април на Меѓународниот ден на Ромите сакавме да поставиме камен темелник за отпочнување на изградба на типски куќи каде е планирано да се сместат сите 24 семејства кои живеат во Старата касарна во Кочани и уште неколку други семејства кои се социјално загрозени, без разлика на нивната етничка припадност. Меѓутоа, на 7 април добивме писмо од непознати нарачатели преку кое бевме известени дека локалните жители на Трајаново Трло нема да дозволат да се изгради до нив нова населба. На 8 април жителите на Трајаново трло организираа мирен протест, но на протестот беше истакнат и транспарент „Само преку нас мртви“ кое јас го осудувам и тоа не треба да ја отсликува сликата за соживотот во Кочани“.
Изградбата на станбени објекти во месноста Пресечена Скала во Кочани коишто ќе бидат наменети за сместување на социјално ранливите семејства од Старата касарна, претставува еден од најзначајните проекти во Кочани со кој се решава прашањето на домувањето на лица од ромска националност, коишто живеат во супстандардни услови. Поради реакција на жители од Трајаново Трло, почетокот на работите на изведувачот се одложува додека Советот на Општина Кочани повторно не се произнесе по ова прашање.
„Противењето да се градат планираните објекти за социјалните семејства коишто живеат во супстандардни услови во Старата касарана во Кочани, доаѓа откако е завршена целата урбанистичка постапка, обезбедени се финансиски средства и е избран изведувач на работите. Но, јас нема да делувам спротивно на барањата на граѓаните, ќе се обидам преку дијалог и разговор да најдам решение од кој ќе бидат задоволни сите“, вели Илијев.
Тој вели дека по протестот на жителите на Трајаново Трло против изградбата на станбените објекти за домување на семејства во социјален ризик, на 9 април, по петочната молитва (џума) Ромите сакаа да протестираат пред општината, меѓутоа протестот се откажа по неговата средба со дел од граѓаните од ромска припадност на која ги слушна нивните ставови и видувања за ова прашање.
„Се соочивме со огромно незадоволство и револт кај претставниците на ромското население. Тие беа подготвени за мирен протест бидејќи се огорчени од пораките што беа испратени од претходниот протест, со кој група граѓани се противат на градбата на живеалишта за семејствата во социјален ризик. Сепак, со конструктивен разговор во кој заеднички се согласивме дека нема потреба од зголемување на тензиите, тие го откажаа најавениот протест, бидејќи за секој проблем постои мирно решение“, вели градоначалникот Илијев.
Градоначалникот на Општина Кочани, Николчо Илијев упати апел до сите граѓан(к)и да живеат сложно како и досега, да нема енички тензии, несогласувања и поделби.
Дехран Муратов
