Што им порачаа на властите читателите на ЦивилМедиа на Граѓанскиот форум, во петокот (20 јуни, 2025).
Во голем број од пораките, граѓаните непрекинато бараат од властите да си заминат, како минатиот петок, така и на сите граѓански форуми на ЦивилМедиа.
ГРАЃАНСКИ ФОРУМ (ПРАШАЊЕ НА ДЕНОТ): Што сакате да им порачате на властите?
Една од пораки за заминување на властите, гласи:
Гледајќи ја нивната неспособност со која не туркаат во се поголема сиромаштија, би им порачала да си одат и да не ни продаваат пуфки за подобро утре! Оваа година, од нив само сивило гледаме и демагогии…
Граѓаните бараат одговорност од пратениците и функционерите, бидејќи платите, додатоците, патните трошоци, учествата по разни комисии се одвоени токму од граѓаните.
Порачуваат да се слуша гласот на народот.
„Слушнете го гласот на народот – Одлуките треба да се базираат на вистинските потреби на граѓаните, а не на лични или партиски интереси.“
Граѓаните им порачаа на властите да се борат против корупцијата
„Справувањето со злоупотребата на јавни ресурси е клучно за довербата во институциите.“
– Подобрување на здравството и образованието – Овие сектори се темел на развојот и треба да добијат приоритет во буџетот и реформите.
– Заштита на животната средина – Чист воздух, вода и почва не се луксуз, туку право на секој човек.
– Повеќе одговорност и транспарентност – Секоја институција треба да биде отчетна за своите постапки пред граѓаните.
Да прекинат да се однесуваат како да ги донеле институциите од дома.
Прво да престанат да крадат, второ да почнат да работат во интерес на државата и народот или во спротивно да ја напуштат власта.
На локалните власти им порачаа дека сакаат чисти улици, безбедни тротоар и и функционално осветлување.
Се бара поддршка за младите, старите лица и ранливите категории.
Повеќе шанси за локален развој – преку соработка со бизнисите и граѓанските организации, порачаа граѓаните.
Меѓу мноштвото пораки, граѓаните им предложија на властите да организираат референдум за стратешките одлуки, по 6 месечна јавна расправа.
„Граѓански форум“ е простор во кој секој петок, како завршница на прашањата на денот, граѓаните без задршки имаат можност преку коментари да испратат пораки, искуства но и критики до властите, институциите, политичарите, а според досегашните одговори, тие тоа го прават на јасно артикулиран начин, со директни пораки и сугестии.
Редакцијата на ЦивилМедиа е отворена за граѓанките и граѓаните не само во петок, туку и секој ден од неделата, да споделат свои пораки, прашања, грижи и искуства, било во коментари или во пораки, и им заблагодарува за довербата, отвореноста и директниот настап. Ве очекуваме секој ден, а во специјализиран простор – секој петок во Граѓанскиот форум.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Т.
