Поранешниот премиер Никола Груевски, на денешната јавна седница во Апелациониот суд, рече дека не сторил кривично дело и дека нема од што да се плаши, туку дека против него се води политички прогон и хајка. Тој рече дека нема да бега, зашто се подготвува за победа на избори! Груевски е обвинет од Специјалното јавно обвинителство за случајот „Титаник“ за изборни нерегуларности.
„СЈО нема докази против мене. Единствениот сведок против мене е Заев. Едвај чекам да почне судењето, за јавноста да се увери дека сум невин“, рече Груевски.
Тој истакна дека ако сакал да бега, за тоа имал две години, односно, откако СЈО најави дека ќе бидат поднесени обвиненија против него. Груевски додаде дека не одбил ниту една покана на на СЈО и дека ќе се појавува на секое рочиште.
„Сум патувал и сум се враќал во земјата. Сум можел да избегам ама не сум го сторил тоа“, рече Груевски. Тој потенцираше дека е семеен човек со вработена сопруга, со малолетни деца и со возрасна родителка за која во иднина, ќе треба да се грижи.
Според него, со решението да му биде одземен пасошот и обврската еднаш неделно да се јавува во суд, гласачите треба да добијат перцепција дека е виновен. Тој потенцира дека овие мерки го ставаат во нерамноправна позиција со конкурентот Заев и дека не можел да лобира за партијата, ако не му го вратат пасошот.
„Зошто за Заев нема мерки на претпазливост?“, ги праша Груевски судиите.
Специјалното јавно обвинителство кое бара притвор за поранешниот премиер Никола Груевски, обвинет во случајот „Титаник“ смета дека Груевски може да избега, додека одбраната смета дека СЈО го поднело обвинението надвор од законскиот рок.
Во одговорот на жалбата СЈО наведува дека Груевски одбегнувал да се јави на распит, иако примал покани редовно. Му биле доставени десет покани, од кои примил само една, а останатите ги примило неговото обезбедување.
СЈО смета дека постои опасноста од бегство поради имотната состојба и состојбата на банкарските сметки кои би му овозможиле живот и надвор од Македонија, зашто, официјално имал 10 милиони денари, 46.000 евра и 7.000 швајцарски франци на банкарските сметки.
Според одбраната, обвинението за Груевски е поднесено вон законскиот рок во кој СЈО имало право да поднесува обвиненија, бидејќи на 30 јуни предметот не бил доставен до Кривичниот суд до 16:30 часот, до кога работи Приемното одделение во судот, туку подоцна, во 21 часот. Според нив, обвинението не било поднесено од овластен тужител поради истекот на рокот од 18 месеци, токму на тој ден.
По јавната седница за поранешниот генерален секретар на Владата, Кирил Божиновски, во судницата се појави и поранешниот министер за транспорт и врски Миле Јанакиески, а во понатамошниот распоред на седниците се и поранешната министерка за внатрешни работи, Гордана Јанкулоска, поранешниот шеф на кабинет на Груевски, Мартин Протоѓер, сите обвинети во „Титаник“.
Д. М.