Илјадници Палестинци го преплавија пунктот за дистрибуција на помош во Газа, поставен од контроверзна група поддржана од САД и Израел, еден ден откако таа почна да работи таму, пренесува Би-би-си.
Видеата покажуваат толпи како одат преку срушени огради и земјени насипи во комплексот на Хуманитарната фондација Газа (GHF) во јужниот град Рафа.
Групата соопшти дека во еден момент нејзиниот тим се повлекол бидејќи бројот на баратели на помош бил преголем. Израелската војска соопшти дека војниците во близина испукале предупредувачки истрели.
GHF, која користи вооружени американски безбедносни изведувачи, има за цел да ги заобиколи ОН како главен снабдувач на помош во Газа, каде што експертите предупредија на претстоен глад по 11-неделната израелска блокада што неодамна беше олесната.
ОН соопшти дека видеата од Рафа се „срцекршачки“ и дека имаат подготвено детален план за да обезбедат доволно помош за „очајното население“ од 2,1 милиони.
ОН и многу хуманитарни групи одбија да соработуваат со плановите на GHF, за кои велат дека се спротивни на хуманитарните принципи и се чини дека „ја претвораат помошта во оружје“.
Тие предупредија дека системот практично ќе ги исклучи оние со проблеми со мобилноста, ќе предизвика понатамошно раселување, ќе изложи илјадници луѓе на штета, ќе ја услови помошта со политички и воени цели и ќе постави неприфатлив преседан за испорака на помош низ целиот свет.
Израел изјави дека е потребна алтернатива на сегашниот систем за помош за да се спречи Хамас да краде помош, што групата го негира
Д. Мишев.
