Инфлацијата мерена преку индексот на трошоците на животот во април 2026 година, во однос на март 2026 година, изнесува 1,3 отсто, покажуваат најновите податоци на Државниот завод за статистика.
Најголем пораст на трошоците е забележан во групата транспорт, каде што цените се зголемиле за значителни 10,1 отсто. Следуваат рекреација, спорт и култура со раст од 1,4 отсто, како и алкохолни пијалаци, тутун и наркотици со зголемување од 1,2 отсто.
Поголеми трошоци за граѓаните се регистрирани и кај храната и безалкохолните пијалаци, кои поскапеле за 0,7 отсто. Раст од 0,6 отсто е забележан кај облека и обувки, лична нега, социјална заштита и разновидни стоки и услуги, како и кај информациите и комуникациите. Рестораните и услугите за сместување поскапеле за 0,4 отсто, додека домувањето, енергенсите, здравствената заштита и образованието бележат пораст од 0,3 отсто.
Во истиот период е регистрирано и намалување на трошоците во групата покуќнина, опрема за домаќинствата и редовно одржување на домаќинствата, за 0,2 отсто.
Цените во групата осигурување и финансиски услуги останале непроменети во однос на претходниот месец.
Индексот на цените на мало во април 2026 година, споредено со март, изнесува 103,2.
На годишно ниво, трошоците на животот во април 2026 година се зголемени за 5,7 отсто во однос на април 2025 година, додека цените на мало бележат раст од 5,0 отсто.
Б. Ј.
