Неодамна екипата на ЦИВИЛ Медиа разговараше со чичко Ратко Исаков, чиј пречек беше повеќе од гостопримлив. Со него зборувавме за патриотизмот и национализмот, но неизоставно беше да позборуваме малку и за екологијата, зеленилото…
Неговиот двор е пример за чистота и љубов кон природата. Зеленилото што го опкружува остава впечаток, дека не се наоѓате во строгиот центар на Скопје. Тој мал рај опколен со високи згради, објекти во изградба и фреквентна улица опстојува само поради огромната посветеност на чичко Ратко.
„Ретки се тие луѓе што сакаат да им е убаво и чисто околу нив, да имаат зеленило. Јас овде во околината и она што е мое и она што не е мое сакам да го направам зелено. Напред на улицата засадив и дрво. Фалеше дрво на улицата, на тротоарот. Собирам ѓубре кога ќе видам по улица, малку ексцентрично ме гледаат луѓето, ама мене ми е добро… Но, ако ти исчистиш сега, за половина час некој поминал, јадел бурек, фрлил, пушел, фрлил,… има луѓе што воопшто не водат сметка дека чистотата е за него….“, вели тој.
Како пензионер и човек што не е исклучен од општествено-политичките збиднувања дури и за еколошките прашања ги обвинува повеќе властите отколку самите граѓани.
„Зеленилото вршеше работа, сега ова со зградите гледате што и воздухот веќе е поинаков од што беше порано… Дали поради некои профити се дозволи да се гради толку сѐ на едно место… изгледа добра пара паѓаше… ама познато е дека која партија е на власт таа ја води и државата. Еве да речеме претходната 12 години,сега оваа година и пол ја води… малку.. уште не ја води.. малку куца… но, тој што треба да го контролира процесот, тој го прави тој неред. Сѐ е корумпирано од власта, зад неа инспекциите, судовите… и се случи тоа што се случи… “
Неговиот став за екологистите е јасен, ако работат во интерес на заштитата на животната средина, во ред, во спротивно потребни се дела, а не зборови.
„Еколошките друштва ако одат во исправен правец дека навистина треба да ги убедиме и властите дека треба нешто да направат за да ни е убаво на сите тоа го признавам, но ако се излегува на протести за некои дневни политички поени нема ништо да се направи. Зеленило со зборење не се прави туку со крамп во раце, ашов, грибло и некој да работи со нив“, објаснува чичко Ратко.
Биљана Јордановска
