„Да се сака државата, земјата во која живееме е убава работа! Само не е убаво да ги занемаруваме сите други околу нас што живеат. Да ги мразиш сите околу себе, посебно од друга нација и други народи не е убава работа! Тоа е веќе национализмот што на голема врата е влезен кај нас“, вели чичко Ратко Исаков, кој топло ја прими екипата на ЦИВИЛ Медиа во својот двор.
Тој како граѓанин смета дека токму политичките партии го задојуваат народот со национализам. Тој вели дека 12 години политичките партии притискале со национализмот, со говорот дека тие се патриоти и јас сакаат земјата, ама оние другите се лоши. Чичко Исаков смета дека национализмот е пракса на сите политичари кога ќе бидат во некоја безизлезна ситуација.
„Нѐ држеа под еден јарем со тој национализам. Ние сме тие Македонците, оние другите не чинат. А тие другите, од нивна страна, пак ние не чиниме, тие се најдобри… А тоа, да се разбереме, го прават политичарите. Народот како народ, ќе си живееше меѓу себе… Кога, ќе речам, по другарот Тито, станавме самостојни, како да сакавме државата да ја одржуваме со национализмот“, вели тој.
„И за било кој проблем“, вели чичко Ратко, „ќе го судреа народот преку национализмот за да можат да ги заташкаат“.
„Патриотот не значи дека треба да го уништиш другиот. Патриотизмот е да ја сакаш и градиш земјата, да градиш односи меѓу луѓето, да биде мирно.., само нашиот менталитет не е таков… Сами вака како што сме се јадеме едни со други, очи ќе си извадиме…. а како да го смениме? Сѐ се врти околу партиите… да влеземе во некој круг, како што имаме можност кај што се стремиме во ЕУ и НАТО, во таков круг луѓе, каде што оние што не водат, партиите малку да го сменат менталитетот, да добијат тутор над главата, малку да им се кажат некои работи… “, изјави чичко Исаков сметајќи дека тука кај што сме нема успех.
Биљана Јордановска
Камера: Атанас Петровски
Текстот е дел од проектот „Патриотизам ДА, национализам НЕ!“ што го спроведува ЦИВИЛ со поддршка од Цивика мобилитас. Содржината на овој текст е единствена одговорност на ЦИВИЛ и на ниту еден начин не може да се смета дека ги одразува гледиштата на Цивика мобилитас, Швајцарската агенција за развој и соработка (SDC) или организациите што ја спроведуваат.
