Пишува: Љубомир Костовски
Претседателот Вучиќ во неделата во 21 часот побрза и во директен пренос на своите телевизии изјави дека неговите победиле на локалните избори со 10:0. Ова му беше битно за да ја потврди својата „прогноза“, која просто не можеше да биде конечна бидејќи броењето не беше секаде завршено а веројатно ќе има и жалби на процесот на гласање.
По сите предизборни притисоци и манипулации со учество и на израелските експерти за валкани операции, денес се знае дека најмалку на две места, во Кула и Севојно резултатот и тоа оној официјалниот не ја потврдува констатацијата на Вучиќ пред камерите.
Најпрво во Кула член на избирачкиот одбор земал пред многу сведоци вреќа со избројани гласови и ја донел дома (!) а потоа, по извесно време од дома вреќата ја однел директно во општинскиот избирачки одмор, со јасна можност дека просто можел да ја промени содржината на избирачките ливчиња. Инаку, разликата помеѓу СНС и второпласираната листа предводена од студенти е 469 гласа, додека имало 427 неважечки гласачки ливчиња (упс!). Како да сфатиме дека токму со тие неважечки листови, можно пречкртувани во домот на оној крадец од избирачкиот одбор, ситуацијата да е „егал“?
Важно е да се каже дека студентската листа нема коалициони партнери, а коалицијата околу СНС ја сочинувале и Социјалистичката партија на Србија, Сојузот на војводинските Унгарци, Српската радикална партија и Сојузот на Србите. Уф, не можат да се добројат…
Според податоците на Општинската изборна комисија, три листи останале под цензусот – Граѓанската група „Млади за Кула“, за која студентите тврдеа дека е лажен список – тие освоиле 144 гласа, додека русинската листа добила 65 гласа, а српските либерали за зелената кула добиле 74 гласа.
По обработката на сите гласачки места во Кула, листата на владејачката коалиција околу Српската напредна партија (СНС) освои 11.796 гласови, што е 51,35 проценти од важечките гласачки ливчиња, додека студентската листа „Глас на младите на општина Кула“ освои 11.327 гласови, или 48,65 проценти, и ќе има 18 мандати.
Општинското собрание Кула има вкупно 37 советнички места.
Тука ќе има изедначен број на советници меѓу првиот и вториот на избирачката листа при што, според анкетата на независната телевизија N1, гласачите за Сојузот на војводинските Унгарци сите до еден изјавија дека тие можат да го подржуваат Вучиќ сѐ додека е тој во добри односи со Орбан. Но, велат дека ако Орбан падне и на власт дојде противкандидатот Маѓар работите ќе се сменат за миг и нивните советници ќе преминат кај студентите!
Во извештајот на „Блиц“ за изборите во Севојно се вели дека на локалните избори за Собранието на Градската општина на таа општина, листата „Александар Вучиќ – Севојно, нашето семејство“ го освои првото место со 49,60 проценти од гласовите и девет советнички мандати, додека две други листи освоија советнички мандати, според прелиминарните резултати на Општинската изборна комисија. Имено, во веста се прикрива дека исто толку мандати има освоено и студентската листа „Уједињени – Севојно“ која донела исто толку советнички мандати – 9!
Разликата од првиот по бројот на гласовите е речиси изедначена и заедно по вториот имаат по 9 мандати, што значи дека ќе ја делат локалната власт. Како? Па ќе видиме ама секако немаме резултат од 10:0.
ЦИВИЛ МЕДИА
