Пожарот кој вчера изби покрај автопатот Скопје – Тетово, е целосно изгаснат, информираат од Дирекцијата за заштита и спасување. Огнот, кој започна на подрачјето на општината Желино, во селото Церово вечерта се прошири во насока на Карпалак покрај автопатот, а беше изгаснат во ноќните часови од страна на тетовските и скопските пожарникари, информираат од Центарот за управување со кризи (ЦУК).
Во текот на вчерашниот ден целосно се изгаснати 29 пожари на отворен простор. Во овој момент 4-те активни пожари на отворен простор се под целосна или делумна контрола.
Според информациите од ЦУК, активен е пожарот во Кратово, во селото Соколица, каде гори ниска вегетација, а под контрола се пожарите во Јасен, каде веќе две недели гори мешана шума, во Гевгелија, на планината Кожуф и во Општината Желино, во селото Мерово, каде гори мешана шума.
