Излезните анкети на парламентарните избори во Грција покажуваат дека конзервативната партија Нова демократија на премиерот Кирјакос Мицотакис е во водство, но веројатно нема да освои доволно места во Парламентот за целосно да формира влада, објави грчкиот весник Катимерини.
Доколку биде потврдено со официјални резултати, Мицотакис ќе мора да бара коалициски партнери за да обезбеди мнозинство во 300-члениот Парламент. Доколку коалициските преговори не успеат, вторите избори би можеле да се одржат кон крајот на јуни или почетокот на јули.
Излезните анкети покажаа дека главниот ривал на Мицотакис, поранешниот премиер Алексис Ципрас (48) и неговата левичарска партија СИРИЗА се наоѓаат на второ место. Анкетите предвидуваа Нова демократија да освои меѓу 121 и 125 пратенички места, со СИРИЗА меѓу 86 и 89 места, со вкупно шест или седум партии кои го надминаа прагот од три отсто од гласовите за да влезат во Парламентот.
Приватните телевизии Мега, Скај, Стар, Антена, Алфа и Open, Action24 и државната ЕРТ, веднаш по затворањето на гласачките места, точно во 19 часот по локално време, објавија заеднички exit polls во соработка со агенциите „Pulse“, „MRB“, „MARC“„Metron analysis“„ GPO“ и „ALCO“.
Според анкетите и резултатите од 80 отсто преброени exit polls:
Нова демократија – од 36 до 40 отсто од гласовите
СИРИЗА – од 25 до 29 отсто
ПАСОК – Движење на промена – од 9,50 до 12,50 отсто
Комунистичка партија на Грција – од 6 до 8 отсто
Грчко решение – од 3,50 до 5,50 отсто
МЕРА25 – 2,50 до 4,50 отсто
Во однос на распоредот на пратеничките места, процените на агенциите, според 80 проценти од преброени exit poll се дека Нова демократија не добива доволен број пратеници за еднопартиска влада.
Сепак, станува збор за проценки на агенциите за рејтинг, а не за официјални резултати.
Денешните избори се први во Грција откако нејзината економија престана да биде под строг надзор од меѓународните кредитори кои обезбедија спасувачки средства за време на речиси децениската финансиска криза во земјата.
Гласањето се одржа според новиот изборен закон за пропорционална застапеност, што го отежнува особено на која било партија да освои доволно гласови за сама да формира влада. Но, за следните избори, законот повторно ќе се промени, префрлајќи се на систем кој ја наградува водечката партија со бонус места и ќе и го олесни добивањето на мнозинството пратенички места.
Мицотакис, 55-годишен поранешен банкарски директор образован на Харвард, имаше стабилна предност во анкетите во пресрет на изборите. Но, неговата популарност доби удар по железничката несреќа на 28 февруари, во која загинаа 57 луѓе. Подоцна беше откриено дека железничките станици биле слабо екипирани и безбедносната инфраструктура уништена и застарена.
Владата беше погодена и од скандал со прислушување во кој новинари и истакнати грчки политичари открија шпионски софтвер на нивните телефони. Откритијата ја продлабочија недовербата меѓу политичките партии во земјата во време кога можеби е многу потребен консензус.
Грчката некогаш доминантна социјалистичка партија ПАСОК веројатно ќе биде во центарот на какви било коалициски разговори. Нејзиниот лидер Никос Андрулакис (44) беше во центарот на скандалот со прислушувањето во кој неговиот телефон беше цел на следење.
Но, лошиот однос на Андрулакис со Мицотакис, кого го обвинува за прикривање на скандалот со прислушувањето, значи дека договор со конзервативците би бил тежок. Неговиот однос со Ципрас е исто така лош, обвинувајќи го дека се обидел да ги украде гласачите на ПАСОК.
Г. Т.
