Националната галерија на Македонија вечер во Чифте амам од 20 часот ќе ја отвори изложбата „100 години од раѓањето на Ибрахим Кодра“, еден од најпознатите ликовни уметници на Албанија и претставник на европскиот кубизам. Ќе бидат претставени 57 дела, главно масло на платно, кои ги отсликуваат сите фази од творештвото на Кодра, почнувајќи од 1942 до 2005 година.
Најголем дел од сликите (36) се донесени од Фондацијата „Ибрахим Кодра“ од Милано, дваесет се отстапени од Националната галерија на Косово, а една слика е од приватен сопственик од Македонија. Најголема слика меѓу изложените е „Фантастична Албанија“ по која, според НГМ, Кодра е препознатлив како автор.
Животниот пат го одвел Кодра (1918 Ишем/Драч – 2006 Милано) од Албанија во Милано и Рим. Почнал да студира во 1938 со стипендија на италијанската влада и завршил на Академијата за ликовни уметности „Брера“ во Милано.
Создавал, другарувал и изложувал со најпознатите имиња на светската уметност во тоа време, како Пабло Пикасо, Анри Матис, Амадео Модиљани, Жорж Руо, Жорж Брак, Хуан Миро, Оскар Кокошка… а во Милано изработил повеќе фрески за најпознатите музеи и згради.
Кодра изложувал во повеќе светски центри (Њујорк, Токио, Палермо, Штутгарт…). Неговите уметнички дела, создадени со посткубистички влијанија се збогатени со реминисценции на традицијата на неговата татковина, Блискиот Исток, Византија, средбите на културите на Средоземното Море. Тие се наоѓаат во многу музеи и приватни збирки, меѓу кои и во Музејот на Ватикан.
Изложбата за македонската јавност ќе биде отворена еден месец. (МИА)