Градоначалникот на Општина Вевчани, Сашо Јанкоски за ЦИВИЛ Медиа, даде свои видувања за моменталната политичка состојба во земјата по предвремените парламентарни избори, прогнози за локалните извори во 2021, како и за напредокот кон евроинтеграции.
ЦИВИЛ: Која е Вашата оценка за политичката состојба и процеси по предвремените парламентарни избори кои се одржаа во јули?
Јанкоски: Што се однесува на политичката состојба после предвремените парламентарни избори мислам дека е непроменета исто како и пред нив. Лично јас со ваква неконструктивна опозиција истото и го очекував. Поискрен да бидам очекувам уште поголема опструкција од нив, како на државно така и на локално ниво. Тоа ќе е така се додека партиските интереси се ставаат над државните. Одличен пример е и непочитувањето на џентлеменски 100 дена на владата без критики. Очекувам за брзо да се надмине и бесмислениот проблем со Република Бугарија без при тоа да се навлегува во нашата историја и националност.
ЦИВИЛ: До локалните избори има околу една година. Кои се Вашите прогнози?
Јанкоски: Точно така до локалните избори останува уште околу една година. Јас сум по природа скромен човек, но ќе си дозволам за првпат да бидам нескромен и да се пофалам дека успеав во мојот мандат да донесам многу капитални инвестиции во Вевчани. Што се однесува на моите очекувања, очекувам до крајот на мојот мандат да успеам да ги реализирам преостанатите ветени проекти од изборната програма и искрено се надевам, односно сигурен сум дека повторно ќе ја добијам довербата на вевчанци и во наредните четири години повторно да застанам на чело на Општина Вевчани.
ЦИВИЛ: Како локалната самоуправа во вашата општина се подготвува за интеграции во ЕУ?
Јанкоски: Ние сме мала по територија, но силна по дух општина. Интензивно се подготвуваме за интеграција во ЕУ. Ние и во моментов работиме многу проекти кои се финансирани од ЕУ. Во моментов при сам крај е проектот финансиран од ЕУ за локална и регионална конкурентност “Туристички центар Вевчани” во вредност од 985 000 евра, прочистителна станица за отпадни води финансирана од ЕУ а менаџиран од УНДП во вредност од 350 000 евра, како и многу други кои се реализирале или се реализираат во моментов.
ЦИВИЛ: Колку и на кој начин се почитуваат европските вредности?
Јанкоски: Во неколку наврати спомнав, Вевчани е лулка на демократијата. Тука се носеле европските вредности уште многу, многу одамна. Голем број вевчанци имаат сопруги кои дошле од западноевропските земји и кои со својата култура и религија без проблем се прифатени во оваа наша средина. Вредностите ги носеле и печалбарите, кои работеле во европските центри и кои успевале да го “украдат” најдоброто и да го пренесат. Вевчани и до сега во своите темели ги имаше вградено овие вредности на толеранција, почитување на туѓи култури и традиции исто како и своите, поради тоа Вевчани има свој стил на живеење кој во многу се разликува од начинот на живеење на околните населби.
обработка на текст: Ангела Петровска
