пишува: ЏАБИР ДЕРАЛА
Во пресрет на изборите, важно е да се разграничат областите на дејствување на сите што на било кој начин имаат влијание во јавноста. Нека биде јасно:
ИЗБОРНИОТ МОНИТОРИНГ Е САМО ДЕЛ ОД РАБОТАТА НА ЦИВИЛ
Како голема и влијателна организација, ЦИВИЛ посветува само еден дел од своите ресурси на изборниот мониторинг. Изборниот мониторинг ни оддалеку не е единствената, а уште помалку основната дејност на организацијата која има близу илјада членови и поддржувачи и широк спектар на активности и проекти, теми и области на дејствување.
И на самата тема ИЗБОРИ, активностите и темите на ЦИВИЛ се различни: учество во изборните реформи и граѓанска едукација за правото на глас, од една страна, а изборниот мониторинг, од друга страна. Анализите и медиумското известување за изборите се нешто сосема различно од мониторингот и известувањето за изборните теми. Медиумските содржини често произлегуваат од работата на мониторинг тимот, но во суштина се различни процеси и активности.
СТРОГА ПОДЕЛБА НА ТИМОВИТЕ И ОБЛАСТИТЕ НА ДЕЈСТВУВАЊЕ
Во ЦИВИЛ има прецизна поделба на тимовите и областите во кои тие се инволвирани. Од тие позиции и произлегува овој текст.
Самиот мониторинг, како операција е сложена и целосно независна од работата на другите тимови и областите на дејствување.
ПРИНЦИПИ НА НЕЗАВИСНОСТ И НЕПРИСТРАСНОСТ
И во пресрет на Локалните избори 2021, ЦИВИЛ ќе спроведе изборен мониторинг, сеопфатен, независен и непристрасен. Без оглед на личните убедувања и определби, секој член на тимот на ЦИВИЛ кој работи на изборниот мониторинг има строга обврска да ги следи принципите на независност и непристрасност во својата работа.
Се разбира, тие принципи во целост важат и за сите други аспекти на работата и областите на дејствување на секој поединец или тим што работи во состав на ЦИВИЛ.
Личните ставови се почитуваат и се објавуваат во рубриката СЛОБОДНА ЗОНА. Во таа „зона“ има најразлични ставови од авторки и автори со најразлични убедувања, ставови и определби, од левичарски до десничарски. Сечиј став се почитува и се објавува. Единственото ограничување е во тоа што не е дозволено ширење на омраза по било која основа.
ПРОГРЕСИВНА И АНТИНАЦИОНАЛИСТИЧКА ОРГАНИЗАЦИЈА
Треба да биде јасно и тоа: ЦИВИЛ е прогресивна антинационалистичка граѓанска организација која се залага за европски и зелени вредности, чиј основен мандат е промоција, застапување и одбрана на човековите права и слободи.
Веќе 22 години, ЦИВИЛ се залага за слобода, еднаквост, мултикултурализам и недискриминација.
Оттаму, ЦИВИЛ има јасни ставови и определби, а уредувачката политика на нејзината медиумска платформа е јасна и отворена, со тоа што ги одразува заложбите и позициите на Организацијата.
СЕ БОРИМЕ ЗА ВРЕДНОСТИ
Ние не поддржуваме политичари, политички партии или други центри на моќта. Ние практикуваме, поддржуваме и застапуваме, се бориме за вредности. Секој поединец, група или структура што ги застапува тие вредности е наш сојузник сѐ додека ги поддржува и практикува тие вредности.
Ние работиме во служба на јавниот интерес, во заштита на европските и зелените вредности, како и определбите за заштита на човековите права регулирани со меѓународното право и Уставот на Северна Македонија. Добро е да се знае и тоа дека како дел од самиот Статут на ЦИВИЛ целосно се подразбира Универзалната декларација за човековите права.
ПОВИК ДО СИТЕ ГРАЃАНКИ И ГРАЃАНИ
За крај, би сакал, како претседател на ЦИВИЛ и главен уредник на медиумската платформа на Организацијата, да ги повикам сите граѓанки и граѓани да пријавуваат дезинформации, говор на омразата, кршење на човековите права и изборни нерегуларности.
Ги повикувам, постојано да бидат будни и активни и да поставуваат прашања, колку и да мисли некој дека тие се „незгодни“ или „ненавремени“.
Ги повикувам и да ни помогнат со предлози како најдобро да му служиме на јавниот интерес, а во овој период и да придонесеме кон одржување слободни, фер и демократски избори.
Creative Commons 4.0 (дозволено преземање, со линк до изворот)
